चौँरी गाईको पुच्छर तस्करी गर्ने धादिङ गजुरीका बस्नेत सहित ४ जना पक्राउ

धादिङ,२८ बैशाख ।
चौँरी गाईको पुच्छर तस्करी गर्ने चार जना पक्राउ परेका छन् ।

सशस्त्र प्रहरीले महोत्तरीको जलेश्वर नगरपालिका ३ मा रहेको मलिवाडा बसपार्कबाट पाँच सय ५६ वटा चौरी गाईको पुच्छरसहित चार जनालाई पक्राउ गरेको हो ।

पक्राउ पर्नेमा धादिङको गजुरी गाउँपालिका ८ का ३६ वर्षीय उमेशबहादुर बस्नेत, जलेश्वरका विकासकुमार महत्तो, बाराको सिमरा नगरपालिका १ का ६० वर्षीय सुमन मान्नधर र धनुषाको हसपुर नगरपालिका ४ का ३७ वर्षीय मोहमद अजिन रहेका सशस्त्र प्रहरीले जनाएको छ ।

काठमाण्डौबाट जलेश्वर हुँदै मलिवाडा रुटमा चल्ने प्रदेश २–०३–००१ ख १२१५ नम्बरको बसबाट मलिवाडा बसपार्कमा चौरी गाईको पुच्छर निकाली ठेलामा राख्ने क्रममा सशस्त्र प्रहरी बल नेपाल नम्बर ९ गण महोत्तरीले चार जनालाई पक्राउ गरेको हो ।

बरामद भएको चौरी गाईको पुच्छरको बजार मूल्य २८ लाख ३० हजार रुपैयाँ रहेको बताइएको छ । पक्राउ परेकाहरूलाई चौरी गाईको पुच्छरसहित आवश्यक कारबाहीका लागि सशस्त्र वन सुरक्षा शाखा माईस्थान महोत्तरीमा बुझाइएको छ ।