धादिङ प्रशासनमा वडा कार्यालयबाट सिफारिस भई आएका विषयमा थप निवेदन आवश्यक नपर्ने

धादिङ,१२ ज्येष्ठ।
जिल्ला प्रशासन कार्यालय धादिङले वडाको सिफारिस भएको विषयमा थप निवेदन आवश्यक नपर्ने व्यवस्था गरेको छ ।

बिहिबार प्रशासनले एक सूचना जारी गर्दै जिल्ला प्रशासन कार्यालयमा सेवा लिन आउने सेवाग्राहीलाई दोहोरो निवेदन लेख्ने झन्झट हुन नदिन, निवेदन लेखाउन थप रकम तिर्नुपर्ने बाध्यताको अन्त्य गर्न र सेवा प्रवाहलाई छिटो छरितो र सरल बनाउन स्थानीय तहका वडा कार्यालयहरुबाट सिफारिस भई आएका विषयमा थप निवेदन लेख्नुपर्ने अवस्थाको अन्त्य गरिएको जनाएको छ ।

वडाको सिफारिस भएका विषयमा निवेदन लेखिरहनु नपर्ने भएपनि त्यसका लागि आवश्यक कागजात भने अनिवार्य रहेको प्रमुख जिल्ला अधिकारी बद्रीनाथ गैह्रेद्धारा जारी सूचनामा भनिएको छ ।

प्रशासनद्धारा जारी सूचना जस्ताको तेस्तै

निवेदन आवश्यक नपर्नेसम्बन्धी जिल्ला प्रशासन कार्यालय धादिङको जरुरी सूचना !

जिल्ला प्रशासन कार्यालय धादिङमा सेवा लिन आउने सेवाग्राहीलाई सेवा लिने क्रममा निवेदन लेख्ने झन्झट कम गर्न,निवेदन लेखाउन थप रकम तिर्नुपर्ने बाध्यताको अन्त्य गर्न र सेवालाई छिटो छरितो तथा सुलभ रुपमा उपलब्ध गराउनको लागि स्थानिय तहका वडा कार्यालयहरुबाट सिफरिस भई आएका विषयमा थप निवेदन लेख्नुपर्ने अवस्थाको अन्त्य गरिएको छ । अब थप निवेदनको सटा वडा कार्यालयको सिफारिस पत्रमा उल्लेखित व्यहोरा ठीक साँचो हो,फरक परेमा प्रचलित कानून बमोजिम सहुँला बुझाउँला भन्ने व्यहोराको सहिछाप गराई सेवा प्रदान गरिने व्यहोरा सम्बन्धित सबैको जानकारीको लागि यो सूचना प्रकाशित गरिएको छ ।साथै यस कार्यको लागि सेवाग्राहीले यस कार्यालयको सहायता कक्षमा सम्पर्क राख्नुहुन समेत जानकारी गराईन्छ ।

पुनश्च :वडाको सिफारिस भएका विषयमा निवेदन लेखिरहन नपर्ने भएतापनि त्यसका लागि आवश्यक दस्तुर(हुलाक टिकट) तथा अन्य कागजातहरु अनिवार्य रुपमा पेश गर्नुपर्ने हुन्छ ।

बद्रीनाथ गैह्रे,प्रमुख जिल्ला अधिकारी