मलेखु–मुग्लिन सडकखण्ड स्तरोन्नतिको काम सुरु:धादिङतर्फ छ पक्की पुल र पाँच आकाशे पुल निर्माण गरिने

धादिङ,१९ जेठ ।
मलेखु–मुग्लिन सडकखण्डको सडक विस्तार र स्तरोन्नतिको काम सुरु भएको छ ।

नागढुङ्गा–मुग्लिन सडक आयोजनाअन्तर्गत पश्चिम खण्डको मलेखु–मुग्लिन सडकखण्डक स्तरोन्नतिको काम थालिएको हो । पहिलो चरणमा पाँच किलोमिटरमा काम भइरहेको छ ।

३९ किलोमिटर उक्त सडकको स्तरोन्नति अन्तरगत धादिङतर्फ २२ किलोमिटर र चितवनतर्फ १७ किलोमिटर सडक स्तरोन्नति हुने नागढुङ्गा–मुग्लिन सडक आयोजना (पश्चिम खण्ड) का प्रमुख किरण कार्कीले जानकारी दिनुभयो ।

सडक विस्तार र स्तरोन्नतिपछि न्यूनतम नौ मिटर कालोपत्र हुनेछ। बजार क्षेत्रमा भने चारदेखि छ लेनको सडक निर्माण हुने कार्कीले जानकारी दिनुभयो । बजार क्षेत्रमा फुटपाथ, डिभाइडर र बत्तीको पोलसमेत निर्माण गरिने छ । सडक निर्माणको जिम्मा पाएको शर्मा जेडआइसिजी जेभीले पाएको छ ।

यो खण्डमा पुल निर्माणका लागि सोही कम्पनीसँग सम्झौता भएको छ । काम पनि सँगै सुरु भइसकेको छ । मलेखुसम्म छ पुल निर्माण हुनेछन् । गोमती, चरौदी, खटौटी, हुग्दी, मौवा र बारबाङ खोलामा नयाँ पुल बन्नेछन् ।

खटौटीमा पुल निर्माण अघि बढेको छ। यो खण्डमा १० ठाउँमा आकाशे पुल निर्माण गरिनेछन् । मलेखु, शीतलबजार, बेनीघाट, विशालटार, माझीमटार, फिस्लिङ, कुरिनटार, लेवाटार, रमाइलोडाँडा र मुग्लिनमा आकाशे पुल निर्माण गरिने छन् ।आयोजनाको यो खण्ड रु चार अर्ब ८० करोडको लागतमा विस्तार र स्तरोन्नति गर्न लागिएको कार्कीले बताउनुभयो ।

यो खण्डमा करिब तीन सय ५० रुख काटिने छन् । सडक विस्तार र स्तरोन्नतिपछि कम्तीमा सडक २० वर्ष टिक्ने गरी डिजाइन भएको आयोजनाले जनाएको छ ।सङ्घीय राजधानी काठमाडौँ प्रवेश गर्ने र बाहिरिने मुख्य मार्ग भएका कारण पनि यसलाई निर्धारित समयमै सम्पन्न गर्नका लागि आयोजनाले तीव्रगतिमा काम अघि बढाएको छ ।

सरकार र विश्व बैंकबीच सन् २०२० मा सम्झौता भएसँगै विश्व बैंकको आर्थिक सहयोगमा राजमार्ग विस्तारको काम थालिएको हो । हाल नागढुङ्गा–नौबिसे खण्ड र नौबिसे–मलेखु खण्डमा पनि सडक विस्तारको काम भइरहेको छ ।