यथास्थितिमा बजेट पास गर्न नदिने पाण्डेको भनाई:सरकार छाड्नुपरे पनि तयार रहेको स्पष्टोपत्ति

धादिङ,२६ जेठ ।
नेकपा (एकीकृत समाजवादी)का उपाध्यक्ष एवम सांसद राजेन्दप्रसाद पाण्डेले यथास्थितिमा बजेट पास गर्न नदिने बताउनुभएको छ ।

शुक्रबार काठमाडौंमा भएको पार्टी निकट समाजवादी प्रेस संगठनको पहिलो केन्द्रिय अधिवेशनलाई सम्बोधन गर्दै पाण्डेले अहिलेकै अवस्थामा बजेट पास हुन नसक्ने बताउनुभएको हो ।

उहाँले वर्तमान बजेट असमानता र अन्यायपूर्ण रहेको भन्दै यथास्थितिमा कुनै पनि हालतमा बजेट पास हुन नदिने र त्यसको सजाय सरकार छोड्नुपर्ने भए पनि पार्टी तयार रहेको स्पष्ट पार्नुभयो ।

उहाँले १६५ वटा निर्वाचन क्षेत्रमा असमान व्यवहार गर्ने बजेट आफू र आफ्ना पार्टीलाई स्वीकार्य नहुने बताउनुभयो ।

११० करोड डडेलधुरा, ५५ करोड गोरखा र ७०–७५ करोड नुवाकोटमा गरी कुल २३२ करोड बजेट छुट्याइएको र बाँकी ७४ जिल्लामा २६८ करोड बजेट छुट्याइएको भन्दै यो कुनै पनि अवस्थामा सह्य नहुने चेतावनी दिनुभयो ।

उपाध्यक्ष पाण्डेले अरु पार्टीहरुको इसारामा चल्दा पार्टी निर्माण गर्न नसकिने बताउनुभएको छ ।