नीलकण्ठ नगरपालिकाका ५२ टोल विकास समितिलाई सवलिकरण तालिम

धादिङ,११ असार।
धादिङको नीलकण्ठ नगरपालिकाका टोल सुधार समितिलाई सवलिकरण तालिम दिइएको छ।

टोल विकास संस्था महासंघ धादिङको आयोजना तथा नीलकण्ठ नगरपालिकाको सहयोगमा नगरपालिका क्षेत्र भित्र रहेका ५२ वटा टोल विकास समितिका पदाधिकारीहरुलाई ‘स्वच्छ सहर,धादिङबासीको रहर भन्ने मूल नारासहित’सवलिकरण तालिम सञ्चालन गरिएको हो ।

तालिमको उद्घाटन गर्दै कार्यक्रमका प्रमुख अतिथि नगरपालिकाका प्रमुख भिम प्रसाद ढुङ्गानाले टोल विकास संस्थाले सहयोग नगरेको भए नीलकण्ठ नगरपालिका यो अवस्थामा नआउने बताउनुभयो । ढुङ्गानाले धादिङबेशीको सडक पिच गर्न,सडकपेटी बनाउन तथा धादिङबेशीको सुन्दरता थप्न टोल सुधार समितिहरुको हात रहेको बताउनुभयो ।

उहाँले जनताहरु आफै सिसि टिभि क्यामेरा भएकाले जनप्रतिनिधीहरुले गरेका गल्ति कमजोरी औलाउन आग्रह गर्नुभयो ।नागरिकहरु आफ्नो घर अगाडीको फोहोरलाई पनि वेवास्ता गरी छाड्ने बानी रहेको भन्दै ढुङ्गानाले आफ्नो टोल आफै सफा राख्ने बानी बसाल्न टोल सुधार समितिलाई अनुरोध पनि गर्नुभयो ।

यस्तै कार्यक्रममा आफ्नो भनाई राख्दै नगरपालिकाका उपप्रमुख दिपक विश्वकर्माले टोल विकास संस्थाले नागरिक र स्थानिय सरकारबिच पुलको काम गरेको बताउनुभयो ।

त्यस्तै जिल्ला प्रहरी कार्यालय धादिङका सूचना अधिकारी प्रहरी नायव उपरिक्षक सन्तुलाल प्रसाल जैसवारले कुनैपनि कुरा सुधार गर्न आफैबाट सुरु गर्नुपर्ने बताउनुभयो ।

टोल विकास संस्था महासंघ धादिङका अध्यक्ष नर बहादुर श्रेष्ठको अध्यक्षतामा भएको कार्यक्रममा नीलकण्ठ नगरपालिकाका प्रमुख ढुङ्गानाको प्रमुख आतिथ्यता तथा नगरउपप्रमुख विश्वकर्मा,वडा नं ८ का वडाध्यक्ष प्रकाश श्रेष्ठ, जिल्ला प्रहरी कार्यालय धादिङका सूचना अधिकारी प्रहरी नायव उपरिक्षक जैसवारको विशेष आतिथ्यता रहेको थियो ।

कार्यक्रममा ५२ वटै टोल सुधार समितिका पदाधिकारीहरुको सहभागिता रहेको थियो ।

तालिममा टोल विकास समितिका पदाधिकारीहरुलाई नागरिक समाज, टोल विकास संस्था, वडा तथा र नगरपालिकाको भुमिका, टोल विकास संस्थाहरुले गर्नु पर्ने काम कार्य र कर्तव्यहरु, वडा र नगरपालिकाको योजना तर्जुमा, योजना छनोट तथा प्राथमिकता लगाएतका बिषयमा जानकारी गराईएको थियो ।