पछिल्लो दुई हप्तामा थपिए तीन हजार डेङ्गीका बिरामी,धादिङ दोस्रो नम्बरमा

धादिङ,०८ श्रावण।
देशका बिभिन्न जिल्लामा पछिल्लो दुई हप्ता यता झण्डै तीन हजार डेङ्गीका बिरामी थपिएका छन् ।

डेङ्गी सङ्क्रमितको सङ्ख्या अहिले बढेर चार हजार पुगेको इपिडिमियोलोजी तथा रोग नियन्त्रण महाशाखाले सार्वजनिक गरेको तथ्याङ्कमा उल्लेख छ ।यसअघि असार २५ सम्म तथ्याङ्क एक हजारको हाराहारीमा थियो ।

महाशाखाका अनुसार सुनसरीमा मात्रै दुई हजार पाँच सय बिरामी थपिएका छन् । तथ्याङ्क अनुसार धादिङ दोस्रो नम्बरमा रहेको छ। धादिङमा २५८ बिरामी थपिएका महाशाखाले जनाएको छ ।

महाशाखाले सार्वजनिक गरेको तथ्याङ्क स्वास्थ्य संस्थामा आएका बिरामीको मात्र हो । स्वास्थ्य संस्था नआउने तथा सम्पर्कमा नआएका बिरामी अझै हुन सक्ने महाशाखाले जनाएको छ ।

महाशाखाका अनुसार दार्चुलामा १८८, कास्कीमा १४९, सङ्खुवासभामा ५८, काठमाण्डौमा ४६ जना, कञ्चनपुरमा ३९ जना, भक्तपुरमा ३५, म्याग्दीमा ३५ र झापामा ३२ जना सङ्क्रमित भएका छन् ।

साउन महिनासँगै भदौ र असोजमा डेङ्गीको सङ्क्रमण अझै बढ्न सक्ने अनुमान छ ।

डेङ्गी लामखुट्टेबाट सर्ने रोग हो ।पानी जम्ने सफा ठाउँमा एडिज एजिप्टी र एडिस एल्बोपिक्टस प्रजातिको लामखुट्टेले फुल पार्छ । ती फुलबाट लार्भा निस्कन्छ र त्यही लार्भा वयस्क भएर टोकेपछि डेङ्गी लाग्छ ।

स्वास्थ्य मन्त्रालयले लामखुट्टेको टोकाइबाट जोगिनको लागि झुल टाँगेर सुत्न, खेतबारीमा काम गर्दा लामो बाहुला भएको लुगा लगाउन, घरको झ्यालढोकामा जाली हाल्न, लामखुट्टे भगाउने धुप वा मलमको प्रयोग गर्न, घरपालुवा पशुपक्षी व्यवस्थित ढङ्गले पाल्न र घर वरिपरि गमला, टायर वा कुनै पनि खुला भाँडामा पानी जम्न नदिन आग्रह गर्दै आएको छ ।