धादिङमा थपिए ९९ जना डेङ्गीका विरामी,२ हप्तामा संक्रमित ५ सय नाघे

धादिङ,१४ श्रावण।
धादिङमा केही सातादेखि डेङ्गी संक्रमणदर बढ्दो क्रममा छ।

२ हप्ताको अवधीमा ५ सय भन्दा बढिलाई संक्रमण देखिएको छ ।शनिबार र आईतबारमात्रै थप ९९ जनामा संक्रमण पुष्टि भएको छ ।

हिजो शनिबार ४८ जना र आज आईतबार ५१ जना गरी ९९ संक्रमित थपिएको स्वास्थ्य कार्यालय धादिङले जनाएको छ।

संक्रमितमध्ये नीलकण्ठ नगरपालिकाका ८६ जना, बेनिघाट रोराङका ५ जना, ज्वालामुखीका ३ जना,नेत्रावती डवजोङका १ जना,सिद्धलेक त्रिपुरासुन्दरी, गंगाजमुना र धुनीबेशीका ११ जना रहेका छन्।

साउन १ यता जिल्लामा संक्रमित हुनेको संख्या ५०१ पुगेको छ। जसमा पुरुष २६६, महिला २३५ जना छन्। हालसम्मको कुल संक्रमितमध्ये ४५७ जना निलकण्ठका मात्रै छन् ।

साउन महिनासँगै भदौ र असोजमा डेङ्गीको सङ्क्रमण अझै बढ्न सक्ने अनुमान छ । डेङ्गी लामखुट्टेबाट सर्ने रोग हो ।पानी जम्ने सफा ठाउँमा एडिज एजिप्टी र एडिस एल्बोपिक्टस प्रजातिको लामखुट्टेले फुल पार्छ ।

ती फुलबाट लार्भा निस्कन्छ र त्यही लार्भा वयस्क भएर टोकेपछि डेङ्गी लाग्छ । डेंगीको मुख्य लक्षण एक्कासि उच्च ज्वरो आउने,आँखाको गेडी दुख्ने, ढाड, जोर्नी तथा मांसपेशी दुख्ने, वाकवाकी लाग्ने, वान्ता हुने, रातो बिमिरा देखिने लगाएतका हुन्।

स्वास्थ्य मन्त्रालयले लामखुट्टेको टोकाइबाट जोगिनको लागि झुल टाँगेर सुत्न, खेतबारीमा काम गर्दा लामो बाहुला भएको लुगा लगाउन, घरको झ्यालढोकामा जाली हाल्न, लामखुट्टे भगाउने धुप वा मलमको प्रयोग गर्न, घरपालुवा पशुपक्षी व्यवस्थित ढङ्गले पाल्न र घर वरिपरि गमला, टायर वा कुनै पनि खुला भाँडामा पानी जम्न नदिन आग्रह गर्दै आएको छ ।

नेपालमा विसं २०६१ मा पहिलो पटक देखापरेको थियो। त्यसयता क्रमशः बढ्दै गएको तथ्याङ्कले देखाउँछ।