एक वर्षमा ३ अर्बभन्दा बढीको स्याम्पु,क्रिम आयात

दैनिक जीवनमा प्रयोग हुने सामग्रीको आयातमा ठूलो धनराशि खर्च भएको पाइएको छ । सिन्दुर, टुथपेस्ट, कपाल स्याहारको सामग्री आयातमा ठूलो धनराशि विदेशिएको छ ।त्यस्ता सामग्रीको आयातका लागि मात्रै ठूलो परिमाणमा विदेशी मुद्रा खर्च भइरहेको भन्सार विभागले सार्वजनिक गरेको विवरणमा उल्लेख छ।

गएको आर्थिक वर्षमा ’नेल पोलिश’ को आयातमा मात्रै पाँच करोड २७ लाख १८ हजार रुपैयाँ, फेसक्रिम आयतमा ७८ करोड पाँच लाख ८१ हजार रुपैयाँ, ४६ करोड नौ लाख ८९ हजार रुपैयाँ बराबरको ’बडी लोसन’ आयात भएको विभागले जनाएको छ । यसबाट सरकारले २३ करोड चार लाख ८३ हजार रुपैयाँ राजस्व सङ्कलन गरेको छ ।

यस्तैbनेपाली महिलाले प्रयोग गर्ने सिन्दुर पछिल्लो एक वर्षमा एक करोड पाँच लाख ६५ हजार रुपैयाँको सिन्दुर आयात भएको छ । तीन अर्ब रुपैयाँभन्दा बढीको कपाल स्याहारका वस्तु आयात भएका छन् । ६३ करोड २१ लाख ३३ हजार रुपैयाँको स्याम्पु आयात भएको छ भने ६९ करोड ७७ लाख ७९ हजार रुपैयाँका कपालमा लगाउने तेल आयात भएको छ ।

साथै सात करोड ३२ लाख ३८ हजार रुपैयाँ बराबरको कपालमा लगाउने क्रिम आयात भएको छ । त्यस्तै कन्डिस्नर आयातमा १० करोड ४५ लाख ४७ हजार रुपैयाँ खर्च भएको छ ।

कपाल रङ्गाउने वस्तु आयातमा ६२ करोड २० लाख ८३ हजार रुपैयाँ बाहिरिएको देखिन्छ । त्यस्तै कपाल हेरचारका अन्य वस्तु आयातमा ९७ करोड ६१ लाख २० हजार रुपैयाँभन्दा बढी रकम विदेशिएको छ ।

आँखा मेकअपका लागि मात्रै १९ करोड ४० लाख ८० रुपैयाँ खर्च भएको छ । त्यस्तै अन्य शृङ्गारका सामग्री आयातमा तीन अर्ब १३ करोड रुपैयाँभन्दा बढी रकम बाहिरिएको छ ।त्यस्तै विभागका अनुसार गएको आवमा ७१ करोड ३२ लाख ५८ हजार रुपैयाँ बराबरको टुथपेस्ट (मञ्जन) आयात भएको छ । यस्तै ५४ करोड ८४ लाख ८३ हजार मूल्य बराबरको मञ्जन निर्यात भएको छ ।

गएको आवमा ५७ करोड ७६ लाख ९८ हजारको बलपेन , १४ करोड ३८ लाख रुपैयाँभन्दा बढीको पेन तथा मार्कर ,५४ करोड ५१ लाख रुपैयाँभन्दा बढीको पेन्सिल तथा पेन्सिलको लिड ,एक करोड ७२ लाखको पेनका निब, तीन करोड ७२ लाख रुपैयाँका पेनको रिफिल तथा मसी आयात भएको तथ्याङ्क छ ।

यसैगरी ४६ करोड ७२ लाख १५ हजार रुपैयाँको पुनः ग्यास भर्न नमिल्ने, एक करोड २३ लाख ९८ हजार रुपैयाँको ग्यास भर्न मिल्ने तथा अन्य लाइटर ५१ लाख ५५ हजार रुपैयाँ ,मोबाइलबाट फोटो खिच्न प्रयोग हुने विशेष प्रकारको लट्ठी (सेल्फी स्टिक) को आयातमा ६८ लाख ४४ हजार रुफैयाँ खर्च भएको छ भने दुई करोड ५५ लाख २६ हजार रुपैयाँ बराबरको ट्राइपड आयात भएको विभागले जनाएको छ ।