अपडेट:त्रिशुलीमा बस खस्दा ८ जनाको मृत्यु,विस्तृत विवरण आउन बाँकी

धादिङ,०६ भदौ।
धादिङको गजुरी गाउँपालिका-२ स्थित चालीसे झरना नजिकैबाट यात्रुबाहक बस त्रिशुली नदीमा खस्दा ८ जनाको मृत्यु भएको छ।

काठमाडौंबाट पोखरा हुँदै म्याग्दी सदरमुकाम बेनी जाँदै गरेको प्रदेश ३-०१-००५ ख ९९५२ नम्बरको बस बुधबार बिहान सवा ११ बजे त्रिशुलीमा खस्दा ८ जनाको मृत्यु भएको धादिङका प्रहरी प्रमुख एसपी गौतम मिश्रले जानकारी दिए।

मृतकमध्ये २ जना महिला र ६ जना पुरूष छन्। घाइते ८ जनाको उद्धार भएको छ।

घाइते पाँच जनालाई काठमाडौं पठाइएको गजुरी गाउँपालिकाका उपाध्यक्ष शर्मिला बिसुरालले बताइन्।बसको आधा भाग पानीमा डुबेको अवस्थामा छ। घाइतेहरूको उद्धार गरी, गजुरी स्वास्थ्य चौकी, गजुरी अस्पताल र राजमार्ग अस्पतालमा उपचार भइरहेको छ।

गजुरी अस्पतालमा उपचार सम्भव नभएकालाई काठमाडौं पठाइएको बिसुरालले बताइन।घटनाबारे विस्तृत विवरण भने आउन बाकी छ।तस्वीर:रासस