जनैपूर्णिमा, रक्षाबन्धन र गाईजात्रा भोलि नै होःपञ्चाङ्ग निर्णायक समिति

रक्षाबन्धन, जनैपूर्णिमा र गाईजात्रा पर्व भदौ १४ गते बिहीबार नै पर्ने पञ्चाङ्ग निर्णायक समितिले जनाएको छ ।

मंगलबार समितिले विज्ञप्ति निकालेर यस वर्ष तिथिको घटबढका कारण दुई दिनपर्ने पर्व एकै दिन परेको समितिले जनाएको हो। जनमानसमा भ्रम परेको भन्दै विज्ञप्ति निकालेर यसबारे प्रष्ट पारेको हो।

बिहीबार सूर्य उदयकालमा पूर्णिमा रहेका कारण यसैदिन जनैपूर्णिमा र रक्षाबन्धन मनाउन समितिले आग्रह गरेको छ। धर्मशास्त्रको परम्पराअनुसार उदयव्यापिनी (सूर्य उदय भएको) तिथिलाई आधार मान्नुपर्ने भन्दै समितिले बिहीबार नै मनाउनुपर्ने जनाएको छ।

बुधबार ११ः२८ घडी अर्थात् १०ः१७ बजेपछि चतुर्दशी सकिएर पूर्णिमा तिथि लाग्ने पञ्चाङ्गमा उल्लेख छ।बिहीबार ५ः१८ घडी मात्रै पूर्णिमा रहेको बताइएको छ।उदय पूर्णिमा १ घडीमात्र भए पनि त्यही दिन यो पर्व मनाइएको समितिले जनाएको छ।

केही स्थानीय तहले विशेष गरी नेवार समुदायमा मनाइने गाइजात्रा पर्वका लागि बुधबार जनैपुर्णिमा र बिहिबार गाईजात्रा अर्थात् सापारु पर्व मनाउने निर्णय गरेका छन्।