धादिङबेशीमा ‘लाखे जात्रा’(फोटो फिचर)

धादिङ,१४ भदौ।
सदरमुकाम धादिङबेशीमा लाखे नाच सुरु भएको छ। आज विहान बिचबजार चोकस्थित गणेश मन्दिरमा लाखेको विधिवत पुजा गरी जात्राको शुभारम्भ गरिएको हो ।

जनैपूर्णिमा, रक्षाबन्धन र गाईजात्राको अवसरमा नेवार समुदायको संस्कृति, परम्परा र पहिचानलाई मध्यनजर गर्दै आजदेखी परम्परागत शैलीमा लाखे जात्राको सुरुवात गरिएको झिंगु नेवा समाज धादिङका महासचिव राजकुमार श्रेष्ठले बताउनुभयो ।

लाखे जात्रा नेवार समुदायको मौलिक जात्रा हो । यस पर्वलाई जोगाई राख्न विगत वर्षहरुमा पञ्चेबाजा बजाएर मनाइने गरिएपनि हाल नेवार समुदायको आफ्नै बाजा बजाई परम्परागत शैलीमा गरिएको महासचिव श्रेष्ठले बताउनुभयो ।

गाइजात्राको अवसरमा आज दिउँसो १ बजे मृत्यु भएका १० जना नेवार समुदायका मृतकको फोटो सहित गाइ निकालिने र लाखे जात्रा गरिने श्रेष्ठको भनाई छ ।

यसैगरी भोलि १५ गते खेत रोपाइ अभिनय गर्दै लाखेसहित बजार परिक्रमा, भदौ २१ गते श्री कृष्णको रथ यात्रासहित लाखे जात्रा, असोज १ गते हरितालिका तिजको अवसरमा विच बजारमा लाखे नाँच नचाइने र असोज २ गते लाखे जात्रा विधिवत रुपमा समापन गरी लाखे जात्रा मनाइने उहाँले जानकारी दिनुभयो।

नेवार समुदायको जात्रा भएपनि जात्रामा सबैलाई उपस्थित भइदिन झिंगु नेवा समाज धादिङका अध्यक्ष गोविन्द कुमार श्रेष्ठले आग्रह गर्नुभयो । यो जात्रा राष्ट्रिय जात्रा हो ।

कला, संस्कृति तथा परम्परा जोगाइराख्न मनाउने गरिएको जात्रामा सबै जातजाति, समुदाय यो जात्रामा उपस्थित भइदिन उहाँले सबैलाई आग्रह गर्नुभयो ।यस बर्ष रक्षाबन्धन, जनैपूर्णिमा र गाईजात्रा पर्व आजनै परेको छ।

तस्विरमा हेर्नुहोस् :