फुलखेतीमै रमाएका धादिङका एक दम्पति,बार्षिक ८ लाख बढी आम्दानी

धादिङ–धादिङको धुनीबेसी नगरपालिका–९,जुगेडीमा व्यवसायिक रुपमा फुलखेती गर्दै आउनु भएका एक दम्पतीले बार्षिक ८ लाखभन्दा बढी आम्दानी लिने गरेका छन् ।

१८ वर्षदेखि व्यवसायिक रुपमा फूलखेतीमा लागेका हेमलाल र रमाको जोडी उदाहरणीय बनेको छ ।नौविसे आसपासका क्षेत्रमा जग्गा भाडामा लिएर दार्जीलिङबाट आएका केही व्यक्तिले फूलखेती गरेको देखेपछि हेमलालले पनि व्यावसायिक रुपमा फूलखेती गर्ने योजनासहित २०६० सालबाट फूलखेती सुरु गर्नु भएको हो ।

२०६१ सालमा काभ्रेपलाञ्चोक पाँचखालकी रमा श्रेष्ठसँग विवाह गरेका हेमलाल र रमाको जोडी अहिले फूलखेतीमा रमाउँदै आईरहेका छन् ।हेमलालले सुरुमा ग्याड्स र सयपत्री फूलखेती गैनु भएको थियो । त्यसबाट कमाइ राम्रै हुँदै गएपछि हरेक वर्ष लगानी बढाउँदै खेती बिस्तार गर्दै गएको उहा बताउनु हुन्छ ।

२०७२ सालमा १० लाख लगानी डुबेपछि भने केही समय थप लगानीको अभाव भएको श्रेष्ठको भनाइ छ । लगानी अभाव बढ्दै गएपछि केही समय तरकारी खेती गरेर पैसा संकलन गरी पुनः फूलखेतीमा लगानी गरेको उहा बताउनु हुन्छ ।

अहिले उहाको लगानी १४ लाख रुपैयाँ पुगेको छ । उहाले आठ रोपनी जग्गामा फुलखेतीका लागि १५ वटा टनेल बनाउनु भएको छ । टनेल नरहेको जग्गामा भने तरकारी खेती गर्नु भएको छ ।

आफ्नो मुख्य खेती फूल नै भएको उहा बताउनु हुन्छ । गत वर्ष तीन टन फूल बेचेर ६ लाख ९६ हजार आम्दानी भएको उहाले बताउनु भयो । सरकारले पुष्प व्यवसायलाई खासै प्राथमिकता नदिएको हेमलालको गुनासो छ।

नेपालमा फूलखेतीको प्रचुर सम्भावना भए पनि भारतीय फूलले नेपाली व्यवसाय छायामा परेको उहाको गुनासो छ । फूलखेतीबाट छोराहरू पढाएको उहा बताउनु हुन्छ ।

घर खर्च पनि यसैबाट चलेको उहाले बताउनु भयो। कमाइका हिसाबले वार्षिक आठ लाखभन्दा बढी कमाइ हुने गरेको श्रेष्ठको भनाइ छ । नेपालमा फूलखेतीको सम्भावना रहेकाले हरेक वर्ष किसानहरू फूलखेतीमा लाग्नुपर्ने बताउनु भयो ।

पुष्प खेतीको पचार–प्रसार गर्न आवश्यक छ । जन्मदेखि मृत्यु संस्कारमा सवै जाति धर्मका लागि आवश्यक हुने पवित्र फूलखेतीमा सरकारले सहयोग गर्नुपर्ने हेमलालको भनाइ छ।