फुर्केखोलामा ट्रकको ठक्करबाट सिद्धलेकका दुईजनाको मृत्यु,स्थानियद्धारा राजमार्ग अवरुद्ध

धादिङ– पृथ्वी राजमार्गअन्तर्गत धादिङको गजुरी गाउँपालिका–२ स्थित फुर्केखोलामा ट्रकले ठक्कर दिँदा दुईजना बिद्यार्थीको मृत्यु भएको छ।

बुधबार विहान काठमाडौंबाट मुग्लिङतर्फ जाँदै गरेको प्रदेश २–००१ ख ६४१३ नम्बरको ट्रकले ठक्कर दिँदा सिद्दलेक गाउँपालिका-६  परेवाटारका राजकुमार श्रेष्ठको १४ वर्षीय छोरा निर्मल श्रेष्ठ र उद्दव श्रेष्ठको १५ वर्षीय छोरा संजिव श्रेष्ठको घटनास्थलमै मृत्यु भएको जिल्ला प्रहरी कार्यालय धादिङका प्रहरी नायव उपरीक्षक सन्तुलाल प्रसाद जैसवारले बागमती कलमलाई जानकारी दिनुभयो।

मृतक दुवैजना वेनिघाट रोराङ गाउँपालिका-३ रिचोकटारमा रहेको वागेश्वरी माविको कक्षा आठमा अध्ययनरत बिद्यार्थी हुन्।

ट्युसन पढ्न जाँदै गरेका उनीहरुलाई ट्रकले सोही दिशातर्फ जाँदै गरेको अर्को ट्रकलाई ओभरटेक गर्ने क्रममा ठक्कर दिएको प्रहरीले जनाएको छ।घटनापछि भागेको ट्रक र ट्रक चालक रौतहटको चन्द्रपुर नगरपालिका–२ का ४१ वर्षीय अशोक बम्जनलाई इलाका प्रहरी कार्यालय वेनिघाटले नियन्त्रणमा लिएको छ ।

दुर्घटनापछि स्थानीयहरुले क्षतिपुर्तिको माग गर्दै सव उठाउन मानेका छैनन् भने राजमार्गको मलेखु क्षेत्रमा दुईतर्फी सडक अवरुद्ध गराएका छन्।