घाटवेशीस्थित नयाँपुलबाट त्रिशुलीमा हाम फालेका निराजन अझै भेटिएनन्

धादिङ–धादिङको गजुरी गाउँपालिका–५ घाटवेशीस्थित नयाँ पुलबाट त्रिशुलीमा हाम फालेर बेपत्ता भएका एक युवक अझै भेटिएका छैनन्।

सोमबार साँझ साढे ६ बजेतिर नेपाल इन्भेस्टमेन्ट मेगा बैंक हेटौंडाका शाखाका प्रमुख हेटौंडा उपमहानगरपालिका–२ चौकी टोलका ३८ वर्षीय निराजन देवकोटा त्रिशुलीमा हाम फालेका थिए।

उनको खोजी भइरहेको जिल्ला प्रहरी कार्यालय धादिङका प्रमुख एसपी गौतम मिश्रले बताए ।सशस्त्र प्रहरी बलको गोताखोर र प्रहरीको टोलीले अहिले त्रिशुलीका विभिन्न ठाउँमा खोजी गरिरहेको छ।

नयाँ पुल बीचमा प्रहरीले प्रदेश नम्बर ३–००५–क– ४१७६ नम्बरको एभेन्जर बाइक, हेल्मेट र चप्पल फेला परेसँगै पहिचान खुलेको एसपी मिश्रले बताए ।देवकोटाले बीच पुलबाट हाम फालेपछि माछा मार्दै गरेका माझीले देखेर प्रहरीलाई खबर गरेका थिए।

त्यसयता खोजी भइरहेको एसपी मिश्रको भनाई छ ।केही समयअघि मात्रै बैंकको जागिरबाट राजीनामा दिएका देवकोटाको राजीनामा भने स्वीकृत भइसकेको थिएन।

बेपत्ता भएका देवकोटाका परिवार भने प्रहरीको सम्पर्कमा आएका छन्। प्रहरीले देवकोटाको खोजीसँगै घटनाको कारणबारे पनि अनुसन्धान गरिरहेको छ।