थाक्रे गाउँपालिकाको सेवा आफ्नै भवनबाट,पुजा लगाएर शुभारम्भ गरियो

धादिङ। धादिङको थाक्रे गाउँपालिकाले आफ्नै भवनबाट सेवा प्रवाह सुरु गरेको छ।

गाउँपालिकाले आज आइतबार पुजा लगाएर औपचारिक रुपमा आफ्नै नवनिर्मित सुविधा सम्पन्न भवनबाट सेवा शुभारम्भ गरेको हो ।

स्थानीय तह भएदेखि भाडाको घरबाट सेवा प्रवाह गर्दै आइरहेको गाउँपालिकाले महादेवबेसी वजारबाट ३ सय मिटर दक्षिणतर्फ सुविधा सम्पन्न भवन निर्माण गरेको हो ।

यसअघि आफ्नै भवन नहुँदा २/३ वटा घरभाडामा लिएर पालिकाको विभिन्न सेवाहरू अलगअलग ठाउँबाट प्रवाह हुँदै आएकोमा अव सुविधा सम्पन्न एउटै भवनमा प्रवेश गरेपछि गाउँपालिकाबाट पाउने सेवा सुविधा छिटो र सहज तरिकाले प्राप्त गर्न सकिने गाउँपालिकाका अध्यक्ष रामकुमार आचार्यले बताउनुभयो।

उहाँले पालिकामा अब सेवा लिन आउने सेवाग्राहीहरूलाई टोकन सिस्टमबाट सेवा दिदा अझै सहज हुने भएको भन्दै अबदेखि टोकन सिस्टम लागु गरिने बताउनुभयो।

५ करोड ६३ लाखको लागतमा ६ रोपनी क्षेत्रफलमा तिनतले सुविधा सम्पन्न भवनको निर्माण २०७७ जेष्ठबाट सुरु भएको र २०८० असारमा सम्पन्न भएको पालिकाका प्राविधिक पवन सुबेदीले बताउनु भयो।