धादिङमा सम्बन्ध विच्छेदका घटना बढ्दै,५ महिनामा २४१ मुद्दा दर्ता

धादिङ। धादिङमा सम्बन्ध विच्छेदका मुद्दा बढ्दै गएका छन्।

धादिङ अदालतमा दर्ता भएका मुद्दामा सबैभन्दा धेरै सम्बन्ध बिच्छेदका मुद्दा रहेको पाइएको छ। चालु आर्थिक वर्ष २०८०/०८१ को ५ महिनामा जिल्ला अदालतमा दर्ता भएका ६ सय ३३ ओटा मुद्दा मध्य २ सय ४१ मुद्दा सम्बन्ध बिच्छेदका मात्रै रहेकोे जिल्ला अदालतका श्रेष्तेदार माधव भण्डारीले जानकारी दिनुभयो ।

सोमबार जिल्ला अदालत धादिङको आयोजनामा भएको सन्चारकर्मीसँगको अन्तरक्रियामा अदालतबाट भए गरेका गतिविधिहरुको बारेमा जानकारी गराउदै श्रेष्तेदार भण्डारीले सम्बन्ध बिच्छेदका २४१ मुद्दामध्ये १२६ मुद्दा फर्छौट भएको र ११५ मुद्दा बाँकी रहेको बताउनुभयो।

उहाँका अनुसार दर्ता भएका ६ सय ३३ मुद्दामा लागु औषधका ६०, जबरजस्ती करणीका ५२, कर्तव्य ज्यानका १९, ज्यान मार्ने उद्योगको ३१, सवारी ज्यान मार्ने उद्योगका ३४, वन पैदावर सम्बन्धी ११, अशं मानाचामलको ११४ र चेक अनादरको ७१ मुद्दा रहेको छ।

मंसिर २४ गतेसम्मको अवस्थामा अदालतमा दर्ता भएका कुल मुद्दा मध्य ६ सय १७ देवानी, ४ सय ७० मुद्दा फौजदारी र १३ वटा मुद्दा पुनरावेदनतर्फ गरी जम्मम १ हजार १ सय मुद्दा र यी मध्ये ७१६ जिम्मेवारी सरेको मुद्दा र ७६ ओटा २ बर्ष नाघेको मुद्दा रहेको उहाँको भनाई छ।

जसमध्ये चालु आवको ५ महिनामा ३४५ मुद्दा अर्थात ३१.३६ प्रतिशत मुद्दा फर्छौट गरिएको श्रेष्तेदार भण्डारीले बताउनुभयो।

कार्यक्रमलाई सम्बोधन गर्दै अदालतका प्रमुख न्यायाधीश गोपाल प्रसाद बास्तोलाले धादिङमा मात्र नभई देशैभर कम उमेरमा विवाह, जनचेतनाको अभाव, वैदेशिक रोजगार, श्रीमान–श्रीमतीबिच अविश्वास, घरेलु हिंसा लगायतका कारण सम्बन्ध विच्छेदका घटना बढेको बताउनुभयो।

उहाँले अदालत बिसुद्ध जनआस्थासँग जोडिएको संस्था भएको, नागरिकहरुले धेरै आशा र अपेक्षा गरेको संस्था भएको भन्दै बास्तोलाले अदालत प्रतिको विश्वास गुम्न नदिने पनि स्पष्ट पार्नुभयो ।

सामाजिक सञ्जालबाट अदालत प्रति भ्रम फैलाउने काम गरीरहेको भन्दै उहाँले सन्चारमाध्यमले त्यस्ता भ्रमलाई चिर्नुपर्ने दायित्व थपिएको पनि बताउनुभयो।

उहाँले अदालतमा विचाराधीन मुद्दालाई अब चाँडै टुंगोमा पुर्याउने पनि प्रतिबद्धता व्यक्त गर्नभयो।

प्रमुख न्यायाधीश बास्तोलाको अध्यक्षतामा भएको अन्तरक्रिया मा न्यायाधीश गिता श्रेष्ठ, श्रेष्तेदार माधव भण्डारी, तहसिलदार ध्रुवप्रसाद सुवेदी, बिभिन्न सञ्चारमाध्यममा आवद्ध सञ्चारकर्मीहरु सहभागी थिए।

अन्तरक्रिया कार्यक्रममा सहभागी सञ्चारकर्मीहरुले सेवाग्राहीबाट न्याय सम्पादन ढिलो भएको गुनासो आएकोले न्याय सम्पादन चाँडो गरेर पीडितलाई न्याय चाँडो दिनुुपर्ने धारणा राखेका थिए।