रुसी सेनामा भर्ती भएका धादिङका राजकुमारसहित थप तिन नेपालीको मृत्यु

धादिङ।रुसी सेनामा भर्ती हुन गएका थप तीन जना नेपालीको ज्यान गएको पुष्टि भएको परराष्ट्र मन्त्रालयले जनाएको छ।

मन्त्रालयका अनुसार  राहदानी नं. ०७५७३७३८ वाहक धादिङका राजकुमार गिरी, राहदानी नं. १२२९९८९१ वाहक स्याङ्जाका हरिप्रसाद अर्याल र राहदानी नं. ११०२७१७५ वाहक कैलालीका भरतबहादुर शाहको ज्यान गएको पुष्टि भएको हो ।

योसँगै रुस–युक्रेन युद्धमा गएर ज्यान गुमाउने नेपालीको सङ्ख्या १० पुगेको छ ।

यसअघि ज्यान गुमाउनेमा स्याङ्जाको पुतलीबजार–५ का प्रितम कार्की, इलाम–५ का गंगाराज मोक्तान, दोलखाको मेलुङ गाउँपालिका–६ का राजकुमार कार्की, कपिलवस्तुको वाणगंगा–१ का रूपक कार्की, कास्कीका देवान राई, गोरखाका सन्दीप थपलिया र कुन्दन सिंह नागल रहेका छन् ।

यस्तै रुसी फौजमा भर्ना भएका चार जना नेपालीलाई युक्रेनी सेनाले कब्जामा लिएको भन्दै उद्धारका लागि परराष्ट्र मन्त्रालयमा गुनासो पुगेको छ ।

सरकारले नेपालीको रिहाइका लागि युक्रेन सरकारसँग कुराकानीको प्रयास भइरहेको जनाएको छ।