नीलकण्ठ नगरपालिकाले जित्यो धादिङको राष्ट्रपति रनिङ शिल्ड (कुन पालिकाले कति पदक जिते,हेर्नुहोस् सूची)

धादिङ । १३ औं धादिङ जिल्ला स्तरीय राष्ट्रपति रनिङ शिल्ड प्रतियोगिता नीलकण्ठ नगरपालिकाले जितेको छ ।

जिल्ला खेलकुद विकास समिति धादिङको आयोजनामा धादिङबेसीस्थित कवर्डहल परिसरमा सम्पन्न राष्ट्रपति रनिङ शिल्ड नीलकण्ठले जितेको हो ।

नीलकण्ठ नगरपालिकाले २४ स्वर्ण, १३ रजत र ३ कास्य प्राप्त गर्दै १३ औं राष्ट्रपति रनिङ शिल्ड जितेको हो।

यो सँगै नीलकण्ठ नगरपालिकाले लगातार दोस्रो पटक जिल्ला स्तरीय रनिङ शिल्ड जितेको छ । यसअघिको १२ औं राष्ट्रपति रनिङ शिल्ड पनि नीलकण्ठले नै जितेको थियो।

१३ औं संस्करणमा दोस्रो स्थान थाक्रे गाउँपालिकाले हासिल गरेको छ । थाक्रेले ७ स्वर्ण, ३ रजत र १२ कास्य पदक प्राप्त ग¥यो ।

६ स्वर्ण, ६ रजत र १२ कास्य पदकसहित गजुरी गाउँपालिका तेस्रो भयो भने ६ स्वर्ण, २ रजत र ३ कास्यसहित ज्वालामुखी गाउँपालिका चौथो भएको छ ।

प्रतियोगितामा रुवीभ्याली गाउँपालिकाले ३ स्वर्ण, ७ रजत र ३ कास्य प्राप्त गर्यो ।

गल्छी गाउँपालिकाले ३ स्वर्ण, ३ रजत र ७ कास्य, बेनिघाट रोराङ गाउँपालिकाले २ स्वर्ण, ३ रजत र ७ कास्य, गंगाजमुना गाउँपालिकाले २ स्वर्ण, ३ रजत र २ कास्य, सिद्धलेक गाउँपालिकाले १ स्वर्ण २ रजत र २ कास्य प्राप्त गर्यो ।

यस्तै खनियाबास गाउँपालिकाले १ स्वर्ण, २ रजत र १ कास्य, धुनिबेशी नगरपालिकाले ३ रजत र १७ कास्य, नेत्रावती डवजोङ गाउँपालिकाले ३ रजत र १ कास्य र त्रिपुरासुन्दरी गाउँपालिकाले २ रजत र ३ कास्य प्राप्त गरेको छ ।

११ औं संस्करण रनिङ शिल्ड प्रतियोगिता जितेको धुनीबेसी नगरपालिका यस बर्ष ११ औँ स्थान हासिल ग¥यो भने १० औं संस्करणको रनिङ शिल्ड प्रतियोगिताको विजेता बेनीघाट रोराङ सातौँ भयो।

प्रतियोगितामा ज्वालामुखी गाउँपालिका खरीकालिमाटीकी हिरा कुमाल एक्लैले ५ स्वर्ण पदक जितेर रेकर्ड कायम गरेकी छिन् ।

ज्वालामुखीको त्रिपुरासुन्दरी मावि खरीमा कक्षा १२ मा अध्ययनरत हिराले प्रतियोगितामा १०० मिटर दौड, २०० मिटर दौड, ४ ईन्टु १०० मिटर, ४ इन्टु ४०० दौड र लङजम्पमा स्वर्ण जित्न सफल भएकी हुन् ।

माघ १४ गते आईतबारदेखि सुरु भएको प्रतियोगिता १६ गते मंगलबार सम्पन्न भएको हो।

प्रतियोगितामा महिला र पुरुष दुबै तर्फको भलिबल, कबड्डी, कँराते, तेक्वान्दो, उसु, एथ्लेटिक्सका फिल्ड इभेन्ट्समा हाइजम्प, लङजम्प, ज्याभलिङ थ्रो, सटपुट लगायतका खेलहरू भएको थियो ।जिल्ला खेलकुद विकास समिति धादिङका अध्यक्ष प्रताप सिं तामाङको अध्यक्षता भएको समापन कार्यक्रममा बागमती प्रदेश सांसद गोविन्द लम्सालको प्रमुख आतिथ्यता रहेको थियो ।

बिजेता खेलाडी तथा पालिकाहरुलाई पुरस्कार वितरण गर्दै सांसद लम्सालले जिल्लाको खेल क्षेत्र विकासमा सहयोग गर्ने बताउनुभएको छ ।

प्रतियोगितामा १३ वटा पालिकाबाट छनोेट भएर आएका १८ वर्ष सम्मका करिब ९ सय ५० छात्र/छात्राहरुले भाग लिएका थिए । जिल्लाबाट छनोट भएका खेलाडीहरु प्रदेश छनोट पार गर्दै राष्ट्रिय प्रतियोगिताको लागि खेल्न पाउने छन् ।