दुई पोका चाउचाउको पाँचसय लिएपछी धादिङको ह्याम्लेट रेष्टुरेन्टलाई एक लाख जरिवाना

धादिङ । पृथ्वी राजमार्ग अन्तरगत धादिङको गल्छि गाउँपालिका–४ मासटारमा रहेको ह्याम्लेट रेष्टुरेन्टलाई एक लाख जरिवाना तिराईएको छ ।

दुई वटा चाउचाउको पाँच सय रुपैँया असुल्ने उक्त रेष्टुरेन्टलाई जिल्ला अनुगमन समितिले एक लाख जरिवाना गरेको हो ।

२० रुपैँया पर्ने वाइवाइ चाउचाउको दुइ वटा पकाएर दिएको र पाँच सय रुपैँया तिरेको बिलसहित एक जना उपभोक्ताले जिल्ला प्रशासन कार्यालय धादिङमा उजुरी गरेपछी पैसा तिरेको बिलसहित बोकेर अनुगमनमा पुगेको टोलीले उपभोक्ता संरक्षण ऐन २०७५ अनुसार कारवाही गरी जरिवाना गरिएको सहायक प्रमुख जिल्ला अधिकारी एवम जिल्ला अनुगमन समितिका संयोजक हुमनाथ पराजुलीले जानकारी दिनुभयो।

अनुगमन समितिले गल्छिकै नवोदिप स्टोर र रिभर भ्यू क्याफेलाई पनि दश/दश हजार जरिवाना तिराएको छ ।

विगतका समयमा गरिएको अनुगमनका क्रममा दिएको निर्देशन पनि पालना नगरेको र सामानको अधिकतम मूल्य लिएकाले जरिवाना गरिएको पराजुलीले बताउनुभयो ।

तोकिएको मूल्य भन्दा बढी लिने होटल तथा पसलहरुलाई कडा भन्दा कडा कारवाही गरिने उहाँको भनाई छ ।

विगतका दिनहरुको अनुगमनमा खानेकुराको गुणस्तर हेरेर कारवाही गरिएको भन्दै पराजुलीले पछिल्लो समय एमआरपीमा उपभोक्ता ठगिने गुनासो आएको अबका दिनमा महंगो मूल्य असुल्नेहरुमा फोकस गरेर अनुगमन गरिने बताउनुभयो ।

उहाँले महंगो मूल्य असुल्ने कुनै पनि होटल, किराना पसल तथा क्याफेहरुको खरिद बिल र प्रमाणसहित जिल्ला प्रशासन कार्यालयमा उजुरी गर्नपनि उपभोक्तालाई आग्रह गर्नुभयो ।