धादिङमा आजदेखि राष्ट्रिय रनिङ शिल्ड दोहारीगीत प्रतियोगिता,प्रधानमन्त्रीले उदघाटन गर्ने,देशभरबाट ४८ समुह सहभागी

धादिङ। धादिङको बेनीघाट रोराङ गाउँपालिका–७,चरौंदीमा आजदेखी ७ औं राष्ट्रिय रनिङ्ग शिल्ड खुल्ला दोहोरी गीत प्रतियोगिता सुरु हुदैँछ ।

राष्ट्रिय लोक तथा दोहोरीगीत प्रतिष्ठान नेपालको आयोजनामा आजदेखी खुल्ला दोहोरी गीत प्रतियोगिता हुने भएको हो ।

प्रतियोगिताको समुद्घाटन नेपाल सरकारका सम्माननीय प्रधानमन्त्री पुष्पकमल दाहाल “प्रचण्ड” ले गर्नुहुने प्रतिष्ठानकी अध्यक्ष रीता थापा मगरले बताउनुभयो ।

नेपालको मौलिक र संकृतिलाई बचाई राख्नको लागि प्रतियोगिता आयोजना गरिएको पत्रकार सम्मेलनमा अध्यक्ष मगरले बताउनुभयो।प्रतियोगितामा उत्कृष्ट प्रतिस्पर्धी समूहहरुबाट सर्वोत्कृष्ट छनौट गरिने उहाँको भनाई छ ।

अनुभवी अग्रज कलाकारहरु निर्णायक रही प्रतिभावान र उत्कृष्ट कलाकारहरुको बीचमा दोहोरी खेलाईने छ ।

उक्त कार्यक्रमको सम्पूर्ण अडियो, भिडियो राष्ट्रिय लोक तथा दोहोरीगीत प्रतिष्ठान नेपालको आफ्नै अफिसियल युट्युब च्यानलबाट प्रकाशन तथा प्रशारण गरिने, संस्थाको आधिकारिक फेसबुक पेज र युट्युबबाट समेत लाइभ प्रशारण गरिने र प्रतियोगिता करिब ५० लाख नेपाली दर्शकले अवलोकन गर्ने अनुमान गरिएको अध्यक्ष मगरले बताउनुभयो ।

कार्यक्रम करीब तीस हजार दर्शकले प्रत्यक्ष अवलोकन गर्ने साथै विभिन्न माध्यम मार्फत स्वदेश तथा विदेशमा रहनुहुने करिव पचास लाख नेपाली र नेपाली भाषी दर्शकले अवलोकन गर्ने अपेक्षा गरिएको उहाँको भनाई छ ।

प्रतियोगितामा देश तथा विदेशबाट ४८ समुह सहभागी हुने छन् ।

प्रतियोगितामा प्रथम, द्धित्तिय, तृतिय र सान्त्वना हुनेले क्रमश तीन लाख, दुइ लाख, एक लाख र पचास हजार पाउने छन् । प्रतियोगी कलाकारहरु मध्येबाट उत्कृष्ट गायक,उत्कृष्ट गायिका, उत्कृष्ट भेषभुषा, उत्कृष्ट नवगायक, उत्कृष्ट नवगायिकालाई समेत आकर्षक पुरस्कारको व्यवस्था गरिएको छ ।

राष्ट्रिय लोक तथा दोहोरीगीत प्रतिष्ठान नेपाल,बागमती प्रदेश सह–आयोजक तथा राष्ट्रिय लोक तथा दोहोरीगीत प्रतिष्ठान नेपाल धादिङ स्थानीय व्यवस्थापक रहने प्रतियोगितामा इन्द्रेणी सांस्कृतिक विकास केन्द्रको प्रमुख प्रायोजन, कार्यक्रमको संरक्षक नेपाल सरकार, संस्कृति, पर्यटन तथा नागरीक उड्डयन मन्त्रालय, बागमती प्रदेश सरकार, संस्कृति, पर्यटन तथा सहकारी मन्त्रालय एवम् बेनीघाट रोराङ गाउँपालिका धादिङ रहेको छ।कार्यक्रमको प्रबर्द्धकका रुपमा नेपाल पर्यटन बोर्ड, टोखा नगरपालिका, टोखा नगरपालिका वडा नं ७ साथै राष्ट्रिय लोक सञ्चारकर्मी नेपाल रहेको छ।

प्रतियोगीता हेर्न आउने दर्शकसंग कुनै पनि किसिमको शुल्क नलिइने आयोजकले जनाएको छ ।प्रतियोगिता ८ गतेसम्म सञ्चालन हुने छ।