बजार अनुगमन : धादिङको एक कृषि सहकारी र दुई एग्रोभेटलाई जरिवाना

धादिङ । धादिङमा बजार अनुगमन जारी रहेको छ ।जिल्ला अनुगमन समितिले जिल्लाको विभिन्न स्थानमा रहेको फर्महरु, सहकारी, एग्रोभेटहरुमा अनुगमन गरिरहेको छ ।

शनिबार बेनीघाट रोराङ गाउँपालिकाको बिभिन्न स्थानमा रहेको ‘कृषि सहकारी र एग्रोभट गरी १४ वटामा अनुगमन गरिएको जिल्ला अनुगमन समितिका संयोजक एवम् सहायक प्रमुख जिल्ला अधिकारी हुमनाथ पराजुलीले बताउनुभयो ।

अनुगनको क्रममा किसानलाई विउ विजन विक्रि वितरण गर्ने एक कृषि सहकारी र दुई एग्रोभेट कारवाहीमा परेका छन् ।

पराजुलीका अनुसार बेनीघाट रोराङ गाउँपालिका–९ मा रहेको जनभावना कृषी बहु उदेश्यीय सहकारी संस्था लिमिटेडलाई २० हजार जरिवाना गरिएको छ ।

त्यसैगरी, बेनिघाटरोराङ गाउँपालिका– ७ मा रहको इन्द्र भेटेनरी सेन्टरलाई १० हजार र बेनिघाटरोराङ गाउँपालिका– १० मा रहेको मनकामना भेट एण्ड एग्रोभेटलाई ५ हजार जरिवाना गरिएको उहाँले बताउनुभयो।

यसअघि गाउँपालिकाबाट अनुगमनका क्रममा दिइएको निर्देशनहरू पालना नगरेको, खरिद बिल नभएको, म्याद नाघेको बीउ विजन तथा विषादी बिक्रीको लागि राखेको भेटिएपछि उपभोक्ता संरक्षण ऐन, २०७५ बमोजिम जरिवाना गरिएको अनुगमन समितिका संयोजक पराजुलीले बताउनुभयो ।

अनुगमनका क्रममा करिब ७५ हजार रूपैयाँ बराबरको म्याद नाघेको विषादी तथा बीउ बिजन जफत गरिएको घरेलु तथा साना उद्योग कार्यालय धादिङका प्रमुख मेघनाथ गौतमले बताउनुभयो ।

साथै अनुगमनका क्रममा ११ वटा फर्मलाई सुधार गर्न निर्देशन दिइएको उहाँले बताउनुभयो ।