बालिका करणी आरोपमा सिद्धलेकको कालिदेवी माविका शिक्षक पक्राउ

धादिङ । १५ वर्षीया बालिकालाई करणी गरेको आरोपमा सिद्धलेक गाउँपालिका–४ को कालिदेवी माविका शिक्षक पक्राउ परेका छन् ।

बिहिबार जिल्ला प्रहरी कार्यालय धादिङमा उजुरी दर्ता भएपछि सिद्धलेक–४ का ३२ वर्षीय शिव थापामगरलाई पक्राउ गरिएको जिल्ला प्रहरी कार्यालय धादिङका ईन्स्पेक्टर अभय लामाले जानकारी दिनुभयो।

आरोपितले पीडितलाई पटक पटक बलात्कार गरेको भन्दै पीडित पक्षबाट बिहिबार उजुरी दिएको ईन्स्पेक्टर लामाले बताउनुभयो ।आरोपितले ०८० मंसिरमा अन्तिम पटक बलात्कार गरेको पीडितको भनाइ छ ।

पीडितको धादिङ अस्पतालमा शुक्रबार स्वास्थ्य परिक्षण गरिएको र आरोपितलाई जिल्ला अदालतको अनुमतिले “जबरजस्ती करणी” मुद्दामा हिरासतमा अनुसन्धानका लागि राखिएको प्रहरीले जनाएको छ ।