होलीमा जथाभावी रङ्ग दल्ने र होहल्ला गर्ने २७७ जना पक्राउ

काठमाण्डौ । होली पर्व मनाउने क्रममा जथाभावी रङ्ग दल्ने तथा होहल्ला गरेको आरोपमा दुई सय ७७ जना पक्राउ परेका छन् ।

आइतबार होली खेल्ने क्रममा २६२ जना पुरुष र १५ जना महिला पक्राउ परेको जिल्ला प्रहरी परिसर काठमाण्डौका प्रमुख तथा प्रहरी वरिष्ठ उपरीक्षक भुपेन्द्र खत्रीले जानकारी दिनुभयो ।

कानुन विपरीत काम गर्नेलाई नियन्त्रणमा लिएको र अवस्था हेरेर केहीलाई परिवारको जिम्मा लगाइने र केहीको हकमा मुद्दासमेत दायर हुने उहाँको भनाइ छ।

यसैगरी, जिल्ला प्रहरी परिसर काठमाण्डौले ६६४ वटा गाडीलाई नियन्त्रणमा लिएको जनाएको छ ।

जसमध्ये चारपाङ्ग्रे छ सय ४९ तथा दुई पाङ्ग्रे १५ वटा रहेका जिल्ला प्रहरी परिसर काठमाण्डौले जनाएको छ ।

जाँडरक्सी खाएर  गाडी चलाउने तथा गाडीका कागजपत्र नबोक्ने, हेल्मेट नलगाई  माेटरसाइकल, स्कुटर  चलाउनेलाई कारबाही गरिएकाे प्रहरीले जनाएको छ ।