एसइई आजदेखि : धादिङका ४ हजार ९ सयसहित देशभरबाट पाँच लाखबढि परिक्षार्थी सहभागी हुँदै

माध्यमिक शिक्षा परीक्षा (एसइई) को परीक्षा आजदेखि शुरु हुदै छ ।

आजदेखि २७ गतेसम्म सञ्चालन हुने यस वर्षको एसइर्ई परीक्षा विहान ८ बजेबाट ११ बजेसम्म सञ्चालन हुनेछ ।आज पहिलो दिन अङ्ग्रेजी विषयको परीक्षा हुनेछ ।

व्यवस्थित, मर्यादित, निष्पक्ष, भयरहित र शान्तिपूर्ण वातावरणमा सञ्चालन गर्न परीक्षामा खटिने केन्द्राध्यक्षलगायत जनशक्तिलाई अभिमुखीकरण गरिएको बोर्डले जनाएको छ ।

बोर्डका अनुसार सामुदायिक तथा संस्थागत गरी १० हजार ८०६ विद्यालयका दुई लाख ५० हजार ७७२ छात्रा, दुई लाख ५३ हजार ६२७ छात्र र अन्य १५ जना गरी कूल पाँच लाख चार हजार ४१४ परीक्षार्थी सहभागी हुदै छन् ।

कूल परीक्षार्थीमध्ये ५०६ विद्यालयका १५ हजार ७४९ जना परीक्षार्थी प्राविधिक धारतर्फ रहेको बोर्डले जानकारी दिएको छ । त्यसैगरी परीक्षामा यौनिक तथा लैङ्गिक अल्पसङ्ख्यक समुदायका १५ जना परीक्षार्थी सहभागी हुदै छन् ।

त्यस्तै परीक्षाका लागि दुई हजार ६४ परीक्षा केन्द्र निर्धारण गरिएको छ।

यसैगरी यसवर्ष धादिङ जिल्लाबाट १५९ बिद्यालयका ४ हजार ९११ परिक्षार्थी सहभागी हुँदैछन् । जसमध्ये २०७ जना प्राबिधिक तर्फका र ग्रेडबृद्धी तर्फ २१ जना परिक्षार्थीले परिक्षा दिने जिल्ला शिक्षा समन्वय इकाई धादिङका शाखा अधिकृत कृष्ण कुमार श्रेष्ठले जानकारी दिनुभयो ।

परिक्षाका लागि जिल्लामा २४ वटा परिक्षा केन्द्र तोकिएको छ ।

उहाँका अनुसार प्रत्येक केन्द्रमा प्रहरी, केन्द्राध्यक्ष, सहायक केन्द्राध्यक्ष र निरिक्षकको व्यवस्थापन भईसकेको छ भने उत्तरपुस्तिका र प्रश्नपत्र पुगिसकेको छ ।

विगतका बर्षमा २६ वटा परिक्षा केन्द्रबाट परिक्षा सञ्चालन गरिएकोमा यसबर्ष २ वटा केन्द्र घटाईएको छ ।

बिद्यार्थी संख्या घटेर परिक्षा दिने बिद्यार्थी एक सय पनि नपुगेपछी केन्द्र घटाईएको श्रेष्ठले बताउनुभयो । उहाँको अनुसार रुवी भ्याली गाउँपालिकाको मुक्रावदेबी मावि र सिद्धलेक गाउँपालिकाको सिद्धेश्वर माविमा परिक्षा केन्द्र हटाईएको छ ।

उहाँले परिक्षालाई मर्यादित र शान्तिपूर्णरुपमा सम्पन्न गर्न सबैलाई आह्वान गर्नुभएको छ ।जिल्लामा गत बर्षको तुलनामा यस वर्ष झण्डै पाँच सय परिक्षार्थी कम रहेका छन् ।