धादिङ त्रिपुरासुन्दरीका एक वडा अध्यक्षले च्याते कार्यपालिकाको माईन्युट

धादिङ । त्रिपुरासुन्दरी गाउँपालिका वडा नम्बर ७ का अध्यक्ष सुवास अधिकारी (दर्पण) ले गाउँपालिकाको निर्णय पुस्तिका (माईन्युट) च्यात्नुभएको छ।

मंगलबार कार्यपालिका बैठकमा बबण्डर मच्चाउदै बैठक बहिस्कार गरेका अधिकारीले बुधबार निर्णय पुस्तिका अध्ययन गर्ने भन्दै मागेर च्यात्नुभएको हो।

वडाध्यक्ष अधिकारीको कार्यशैलिप्रती गाउँपालिकाले एक विज्ञप्ती मार्फत खेद व्यक्त गरेको छ ।

वडाध्यक्ष अधिकारीले जेठ २९ गते बसेको गाउँकार्यपालिका बैठकको निर्णय र जेठ २५ गते गरेको गाउँ शिक्षा समितिको निर्णयहरु हेर्ने बहाना गरी कर्मचारीद्वय सुरेश रिजाल तथा स्रोत व्यक्ति नवराज पाठकबाट जवर्जस्ती निर्णय पुस्तिका खोसेर च्यातिदिएको गाउँपालिकाका प्रवक्ता कुशबहादुर शिटौलाद्वारा जारी गरिएको विज्ञप्तीमा भनिएको छ ।

निर्वाचित जनप्रतिनिधि जस्तो गरिमामय पदमा बसेको व्यक्तिले यस्तो घृणित कार्य गरेकोमा गाउँपालिका खेद प्रकट गर्दछ,विज्ञप्तीमा भनिएको छ ।

यता वडा अध्यक्ष अधिकारीले गाउँकार्यपालिका र गाउँ शिक्षा समितिको निर्णय पुस्तिका जबर्जस्ती च्यातिएको भनि लगाइएको आरोप सहितको विज्ञप्तीप्रति खण्डन गर्नुभएको छ।

अधिकारीले आज विज्ञप्ती जारी गर्दै असमान ढंगबाट शिक्षा समितीको सिफारिसमा विद्यालय डाउन र शिक्षक मिलानको काम गरेको र आफुले पटक पटक भन्दा पनि नमानेका कारण निर्णय च्यातिदिएको बताउनुभयो।

बिद्यालयहरु कक्षा ८ बाट कक्षा ५ मा डाउनसाईज गर्ने निर्णय कार्यान्वयन नभएकोले पुनः पटक पटक शिक्षा समितिको बैठक बसी कक्षा ६ र ७ सञ्चालन गराउन गाउँपालिकाले गरेको असमान निर्णयले जलजले आ. वि. र जनज्योती आ.वि. डाउनसाईज तथा चक्रेश्वरी आ.वि.को दरबन्दी र राहत शिक्षक सट्टा पट्टा लगाएतको निर्णय प्रति पटक पटक भएको छलफलको वेवास्ता गरी आफुहरुले गरेको बिगतका कमीकम्जोरीलाई ढाकछोप गर्न केही जनप्रतिनिधीहरु उपाध्यक्ष देवराज धरेल र प्रवक्ता तथा वडा अध्यक्ष कुश बहादुर सिटौलाले बहुमतको नाममा जबर्जस्ती निर्णय गराएकोले सो निर्णयलाई बाध्यतावश च्यात्ने परिस्थिती त्रिपुरासुन्दरी गाउँकार्यपालिका र शिक्षा समितीले बनाएको हुनाले उक्त निर्णयका प्रतिहरु च्यातिएको जानकारी सम्पुर्ण त्रिपुरासुन्दरी गाउँपालिकाका आदरणीय बासिन्दाहरुलाई अवगत गराउदै गाउँपालिकाको प्रवक्ताद्धारा निकालिएको विज्ञप्ती प्रति गहिरो खेद प्रकट गर्दछु,वडा अध्यक्ष अधिकारीद्वारा जारी विज्ञप्तीमा भनिएको छ ।

अधिकारी माओवादी केन्द्रबाट निर्वाचित वडाअध्यक्ष हुनुहुन्छ ।

यस्तो छ,गाउँपालिकाद्धारा जारी बिज्ञप्ती

हेर्नूहोस् वडा अध्यक्ष अधिकारीद्वारा जारी विज्ञप्ती