धादिङमा एक बलात्कार मुद्दा बालविवाहमा परिणत,आरोपितलाई १८ महिना कैद सजाय

धादिङ । जिल्ला अदालत धादिङले एक जबरजस्ती करणी मुद्दालाई बालविवाहमा परिणत गरेको छ ।

१६ वर्षीया बालिका बलात्कार गरेको आरोपमा पुर्पक्षका लागि थुनामा रहेका गल्छी गाउँपालिका–८ का २९ वर्षीय पूर्ण बहादुर भन्ने दीपक तामाङलाई मंसिर ५ गते जिल्ला न्यायाधीश गोपाल प्रसाद बास्तोलाको इजलासले करणी मुद्दालाई बालविवाहमा परिणत गरी कसुर ठहर गरेको हो ।

कसुरदारलाई मुलुकी अपराध संहिता २०७४ दफा १७३ को १ बमोजिम एक वर्ष ६ महिना कैद गरी १५ हजार जरिवाना गर्ने फैसला गर्नुभएको जिल्ला अदालतका श्रेस्तेदार माधव भण्डारीले जानकारी दिनुभयो ।

बालिकालाई ०८१ वैशाख १३ र १४ गते बलात्कार गरेको आरोप लगाइ पीडित पक्षले वैशाख २९ गते जिल्ला प्रहरी कार्यालय धादिङमा उजुरी दिएकोमा आरोपितलाई सोही दिन प्रहरीले गिरफ्तार गरी हिरासतमा राखेर अनुसन्धान गरेको थियो ।

प्रहरी अनुसन्धानपछि जेठ २० गते जिल्ला सरकारी वकिल कार्यालय मार्फत जिल्ला अदालतमा मुद्दा मुलुकी अपराध संहिता २०७४ दफा २१९ को ३ ख अनुसार जबरजस्ती करणी मुद्दा दर्ता गरेको थियो ।

सोही मुद्दामा जिल्ला अदालतका न्यायधिस गोपाल प्रसाद बास्तोलाको जेठ २१ गतेको इजलासले आरोपित तामाङलाई पुर्पक्षका लागि थुनामा पठाएका थिए ।

पीडितको वैशाख २९ गते धादिङ अस्पतालमा स्वास्थ्य परीक्षण भएको थियो ।

जिल्ला अदालतले गरेको फैसलामा ०८१ वैशाख १९ गते साथीको घरमा गएकी पीडित बालिकाले कसुरदारसंग विवाह गरेकोले र फोटो समेत विवाहको भएको तथा बालिका वयस्कतर्फ उन्मुख भएकोले बलात्कार नभई बालविवाह भएको ठहर गरेको श्रेस्तेदार भण्डारीले जानकारी दिनुभयो ।