प्रथम नीलकण्ठ मेयर फुटसल कप सुरु : १८ टिम सहभागी,कति छ पुरस्कार राशी ? (फोटो/भिडियो सहित)

धादिङ । सदरमुकाम धादिङवेशीमा प्रथम नीलकण्ठ मेयर फुटसल कप सुरु भएको छ ।

नीलकण्ठ नगरपालिकाको शिक्षा, युवा तथा खेलकुद शाखाको आयोजनामा आज बुधबारदेखी अन्तरपालिका स्तरीय फुटसल प्रतियोगिता सुरु भएको हो ।

प्रतियोगिताको नीलकण्ठ नगरपालिकाका नगर प्रमुख एवम नेपाल नगरपालिका संघका अध्यक्ष भिम प्रसाद ढुंगानाले उद्घाटन गर्नुभएको हो ।

उद्घाटनका क्रममा नगर प्रमुख ढुंगानाले नीलकण्ठमा खेलकुद क्षेत्रलाई विशेष प्राथमिकतामा राखेको भन्दै नगरपालिकामा विभिन्न खेलकुद प्रतियोगिता आयोजना गर्दै आएको बताउनुभयो । उहाँले यस वर्षबाट सुरु गरिएको मेयर कपलाई निरन्तरता दिइने प्रतिबद्धता व्यक्त गर्नुभयो ।

धादिङवेशीस्थित धादिङ फुटसल एकेडेमीमा सुरु भएको प्रतियोगितामा १८ टिम सहभागी छन् ।

प्रतियोगितामा विजयी हुनेले नगद १ लाख १ हजार १११, द्धितिय हुनेले ५१ हजार १११, तृतिय हुनेले २५ हजार र सान्त्वना हुनेले २० हजार रुपियाँ सहित ट्रफी, मेडल र प्रमाणपत्र पाउनेछन् ।

यस्तै उत्कृष्ट खेलाडी, उत्कृष्ट गोलकर्ता, उत्कृष्ट गोलरक्षक र उत्कृष्ट डिफेन्डरले ६–६ हजार पुरस्कार पाउने आयोजकले जनाएको छ ।

प्रतियोगितामा जनप्रतिनिधि, कर्मचारी र स्थायी शिक्षकले मात्रै सहभागी हुन पाउँछन् ।

नीलकण्ठ नगरपालिकाले गत वर्ष पनि यस्तै अन्तरपालिका स्तरीय (जनप्रतिनिधि, कर्मचारी र स्थायी शिक्षकले मात्रै भाग लिन पाउने) फुटसल प्रतियोगिताको आयोजना गरेको थियो ।

यस वर्ष भने प्रथम नीलकण्ठ मेयर फुटसल कपको नाम दिएर प्रतियोगिता आयोजना गरेको हो ।

प्रतियोगिता फागुन १० गतेसम्म सञ्चालन हुने छ ।

थप तस्विर हेर्न तलको लिंक क्लिक गर्नुहोस्

https://www.facebook.com/kalambagmati/

उद्घाटन गर्दै के भने मेयर ढुंगानाले ? हेर्नुहोस् भिडियो