बजार अनुगमन : धादिङका तीन व्यवसायी कारबाहीमा, ६० हजार जरिवाना

धादिङ । पृथ्वी राजमार्ग अन्तरगत धादिङमा सञ्चालित होटलहरुमा अनुगमन गरिएको छ ।

जिल्ला अनुगमन समिति धादिङले सोमबार धुनिबेशी नगरपालिकामा सञ्चालित होटल, कोल्ड स्टोर्सहरूमा अनुगमन गरेको सहायक प्रमुख जिल्ला अधिकारी एवम जिल्ला अनुगमन समितिका संयोजक मोहन प्रसाद न्यौपानेले बताउनुभयो ।

उहाँका अनुसार धुनिबेशी नगरपालिकामा सञ्चालित १५ वटा होटल, एक मासु पसल र एक मिठाई पसलमा अनुगमन गर्दा धुनिबेशी नगरपालिका-८ खानिखोलाको डिजि कोल्ड स्टोरलाई २५ हजार, हाईवे स्टाफ होटललाई २५ हजार र धुनिबेशी नगरपालिका-६ मा रहेको सुर्य मिठाई पसललाई १० हजार जरिवाना गरिएको छ ।

कारबाहीमा परेका होटल तथा मिठाइ पसलले सरसफाइमा ध्यान नदिएको, निरन्तर सचेत गराउँदा पनि सुधार नगरेको र अखाद्य बस्तु बिक्रि गरेको पाइएकोले जरिवाना तिराइएको उद्योग तथा बाणिज्य कार्यालयका प्रमुख चुडामणी पुरीले जानकारी दिनुभयो ।

अनुगमनका क्रममा बिभिन्न होटलहरुबाट ५ हजार भन्दा बढि मुल्यको म्याद सकिएको खाद्यान्न सामाग्रिहरु समेत बरामद गरेको छ ।

सहायक प्रमुख जिल्ला अधिकारी न्यौपानेको नेतृत्वमा ग‌एको अनुगमन टोलीमा उद्योग तथा वाणिज्य कार्यालय, पशु सेवा कार्यालय, कृषि विकास कार्यालय, आन्तरिक राजश्व कार्यालय गल्छी, खाद्य प्रविधि तथा गुण नियन्त्रण कार्यालय र उपभोक्ता हित संरक्षण मञ्चका प्रतिनिधीहरु सहभागी थिए।