एमालेको ‘मिसन जागरण अभियान’ का लागि धादिङमा एमालेले तोक्यो पालिकागत जिम्मेवारी,क-कसले पाए जिम्मेवारी ?

धादिङ । नेकपा एमालेको ‘मिसन जागरण अभियान’ अन्तर्गत धादिङका १३ वटै पालिकामा केन्द्रीय नेताहरूलाई जिम्मेवारी तोकिएको छ ।

आगामी निर्वाचनलाई लक्षित गरी सञ्चालन हुन लागेको यस अभियानका लागि एमालेले धादिङका स्थानीय तहहरूमा नेताहरूको कार्यविभाजन गरेको हो ।

अभियान अन्तर्गत धादिङको धुनिबेसी नगरपालिकामा, थाक्रे, गजुरी र सिद्धलेक गाउँपालिकामा भूमि त्रिपाठी, नीलकण्ठ नगरपालिकामा जानुका सिंखडा, गल्छी र बेनिघाट रोराङ गाउँपालिकामा डा. पुष्पराज कँडेललाई जिम्मेवारी दिइएको छ।

त्यस्तै ज्वालामुखी र गंगाजमुना गाउँपालिकामा क्रान्ति बुर्लाकोटीलाई जिम्मेवारी दिइएको छ भने रुवी भ्याली र खनियाबास गाउँपालिकामा धनबहादुर घलेलाई जिम्मेवारी दिइएको छ ।

नेत्रावती डबजोङ गाउँपालिका र त्रिपुरासुन्दरी गाउँपालिकामा खेमप्रसाद लोहनीलाई जिम्मेवारी दिइएको छ ।

यो अभियानमार्फत नेताहरू सिधै जनस्तरमा पुग्ने पार्टीका विभाग प्रमुख निरज आचार्यले बताउनुभयो ।

‘जनतामा जाऔँ, जनताका कुरा सुनौं’ भन्ने मूल नाराका साथ सुरु गरिएको यस अभियानमा नेताहरूले विगतको निर्वाचनमा भएको हारको समीक्षा गर्ने, कार्यकर्ताको निराशालाई चिर्ने र पार्टीको भावी नीतिबारे स्पष्ट पार्ने जिम्मेवारी पाएका छन् ।

यस पटक एमालेले परम्परागत प्रचार शैलीभन्दा फरक डिजिटल संगठन, ‘अल्गोरिदम’ र ‘पर्सेप्सन म्यानेजमेन्ट’ (भ्रम निवारण र धारणा व्यवस्थापन) मा विशेष जोड दिन कार्यकर्ताहरूलाई निर्देशित गरेको छ ।