धादिङको एक क्याफेमा मःम खाँदा १२ जना बिरामी

धादिङ। धादिङबेँसीस्थित नीलकण्ठ नगरपालिका-३ बिचबजारमा रहेको नुवाकोट फास्ट फुड एण्ड क्याफे (च्वास्स झोल मःम) मा मःम खाएपछि १२ जना बिरामी परेका छन्।

मःम खाएर स्वास्थ्य समस्या देखिएपछि उनीहरूलाई उपचारका लागि धादिङ अस्पताल पुर्‍याइएको थियो।

२ दिन अघि अस्पताल लगिएकामध्ये ६ जनालाई साेहि दिन डिस्चार्ज गरिएको छ भने ६ जनालाई अस्पतालमै भर्ना गरेर उपचार गरिरहेकाे धादिङ अस्पतालका निमित्त अस्पताल निर्देशक डा.नवीन महासेठले जानकारी दिनुभयाे।

उक्त क्याफेमा मःम खाएर मानिसहरू बिरामी परेको जानकारी प्राप्त भएपछि जिल्ला अनुगमन समितिले पसलको अनुगमन गरेको छ।

अनुगमनका क्रममा सरसफाइ तथा खाद्य स्वच्छतासम्बन्धी कमजोरीहरू भेटिएपछि होटललाई सरसफाइ सुधार गर्न तथा खाद्य पदार्थको गुणस्तर कायम गर्न सात दिनको समय दिइएको छ।

जिल्ला अनुगमन समितिका सदस्य सचिव तथा उद्योग तथा वाणिज्य कार्यालय धादिङका प्रमुख चुडामणि पुरीका अनुसार क्याफेलाई बिरामी परेका सबै व्यक्तिको उपचार खर्च व्यहोर्न समेत निर्देशन दिइएको छ।