लायन्स क्लब अफ काठमाडौं सूर्यमुखीको अध्यक्षमा राजाराम रिजाल

धादिङ । लायन्स क्लब अफ काठमाडौं सूर्यमुखीले लायन वर्ष २०२६/२७ का लागि नयाँ नेतृत्व चयन गर्दै पद हस्तान्तरण गरेको छ।

धादिङबेसीमा आयोजित एक कार्यक्रममा निवर्तमान अध्यक्ष लायन विक्रम विश्वकर्माले क्लबको नेतृत्व नवनिर्वाचित अध्यक्ष लायन राजाराम रिजाललाई औपचारिक रूपमा हस्तान्तरण गर्नुभएको हो ।

लामो समयदेखि सामाजिक तथा सार्वजनिक सेवामा सक्रिय नवनिर्वाचित अध्यक्ष रिजालले स्थानीय शान्ति समिति धादिङको संयोजक, धादिङ अस्पताल सञ्चालन तथा व्यवस्थापन समितिको अध्यक्ष, नीलकण्ठ खानेपानी बोर्ड सदस्य तथा विभिन्न शैक्षिक र सामाजिक संस्थामा जिम्मेवारी सम्हालिसक्नुभएको छ ।

अध्यक्ष रिजालले आफ्नो कार्यकालमा स्वास्थ्य, शिक्षा, वातावरण संरक्षण, रक्तदान तथा विपन्न समुदायको सहयोगसम्बन्धी कार्यक्रमलाई प्राथमिकतामा राख्ने बताउनुभयो ।

उहाँले लायन्स क्लबमार्फत समाजसेवालाई अझ प्रभावकारी र परिणाममुखी बनाउँदै समुदायसँगको सम्बन्ध थप सुदृढ गर्ने प्रतिबद्धता व्यक्त गर्नुभयो ।

निवर्तमान अध्यक्ष विक्रम विश्वकर्माको नेतृत्वमा क्लबले गत वर्ष स्वास्थ्य, शिक्षा, रक्तदान, वातावरण संरक्षण तथा सामाजिक सेवाका विविध कार्यक्रम सञ्चालन गरेको थियो ।

क्लबले गजुरी गाउँपालिका–६ स्थित भानुभक्त माध्यमिक विद्यालयमा विशेषज्ञ चिकित्सकहरूको सहभागितामा निःशुल्क स्वास्थ्य शिविर सञ्चालन गरी सयौं स्थानीयलाई स्वास्थ्य सेवा उपलब्ध गराएको थियो। शिविरमा विभिन्न रोगको परीक्षण, परामर्श तथा औषधि वितरण गरिएको थियो।

त्यसैगरी धादिङ अस्पताल परिसरमा आयोजित रक्तदान कार्यक्रममा ११९ पिन्ट रगत गरेको थियो भने अन्य संस्थासँगको सहकार्यमा थप रक्त संकलन अभियानमा समेत क्लब सक्रिय बनेको थियो।

शिक्षा क्षेत्रमा पनि क्लबले बेनिघाट रोराङ गाउँपालिकास्थित एक विद्यालयमा पुस्तकालय स्थापना गरेको थियो। साथै आर्थिक रूपमा कमजोर तथा जेहेन्दार विद्यार्थीलाई छात्रवृत्ति प्रदान गरेर अध्ययनमा सहयोग गरेको जनाएको छ।

क्लबले धार्मिक तथा सामाजिक अवसरहरूमा निःशुल्क स्वास्थ्य परीक्षण, पिउने पानी तथा जलपान वितरण, मानसिक स्वास्थ्यसम्बन्धी सचेतना कार्यक्रम, सरसफाइ अभियान तथा बिरामीलाई फलफूल वितरणजस्ता गतिविधि सञ्चालन गरेको थियो।

कार्यक्रममा लायन्स इन्टरनेसनल डिष्ट्रिक्ट ३२५ आई नेपालका डिपार्टमेन्ट चिफ लायन कृष्णबहादुर पौडेल, रिजन चेयरपर्सन कृष्णप्रसाद ढकाल, कारागार कार्यालय धादिङका कारागार प्रशासक इन्द्रबहादुर खतिवडा, नेपाल रेडक्रस सोसाइटी धादिङ शाखाका कोषाध्यक्ष नारायणकुमार श्रेष्ठ, क्लबका प्रथम उपाध्यक्ष डा.दिनेश रेग्मी, लायन्स क्लब अफ धादिङ मण्डलीका अध्यक्ष हरिकुमार श्रेष्ठ, धादिङ अस्पतालका मेडिकल अधिकृत डा.सबिन भण्डारी र डा.प्रियजन पाण्डे, समाजसेवी भेषराज रिजाल, डेन्टल सर्जन डा.अनिल गुरुङ, हेल्थ असिस्टेन्ट सन्तोष घिमिरेलगायत विभिन्न क्षेत्रका व्यक्तित्वहरूको उपस्थिति रहेको थियो ।