६ घण्टापछि खुल्यो मुग्लिङ-काठमाडौं सडकखण्ड

धादिङ। मुग्लिङ-काठमाडौं सडकखण्ड करिब ६ घण्टापछि सञ्चालनमा आएको छ ।

पृथ्वी राजमार्ग अन्तरगत धादिङको बेनीघाट रोराङ गाउँपालिका-१० स्थित जवाङ खोला क्षेत्रमा आइतबार बिहान ढुङ्गामाटो र लेदोसहितको पहिरो खस्दा अवरुद्ध भएको मुग्लिङ-काठमाडौं सडकखण्ड करिब ६ घण्टापछि सञ्चालनमा आएको हो ।

जिल्ला प्रहरी कार्यालय धादिङका सूचना अधिकारी तथा प्रहरी नायव उपरीक्षक प्रकाश दाहालका अनुसार अविरल वर्षापछि आएको पहिरोले सडक पूर्ण रूपमा अवरुद्ध बनेको थियो।

पहिरोसँगै माथिबाट निरन्तर ढुङ्गा झरिरहेकाले पहिरो हटाउने काममा कठिनाइ भएपछि अवरुद्ध सडक सुचारु गराउन समय लागेको हो।

जेसिवीको प्रयोग गरी पहिरो हटाएर अहिले अवरुद्ध सडक दुईतर्फी सञ्चालनमा ल्याइएको प्रहरी नायव उपरीक्षक दाहालले बताउनुभयो।

Filephoto