धादिङमा ८ हजार सवारी साधनलाई ट्राफिक कारबाही,७२ लाखभन्दा बढी राजस्व संकलन

धादिङ । जिल्ला प्रहरी कार्यालय धादिङले आर्थिक वर्ष २०८२/०८३ मा ट्राफिक नियम उल्लंघन गर्ने ८ हजार ४ वटा सवारी साधनमाथि कारबाही गर्दै ७२ लाख २९ हजार २ रुपैयाँ राजस्व संकलन गरेको छ ।

दुर्घटना न्यूनीकरणलाई प्राथमिकतामा राख्दै वर्षभर ट्राफिक नियम कार्यान्वयन, चालक सचेतना र सवारी साधनको नियमित चेकजाँचलाई तीव्र बनाइएको जिल्ला प्रहरी कार्यालय धादिङका सूचना अधिकारी प्रहरी नायव उपरीक्षक प्रकाश दाहालले जानकारी दिनुभयो ।

प्रहरीका अनुसार वर्षभर २ हजार ८२५ वटा ट्राफिक सचेतनामूलक कार्यक्रम सञ्चालन गरिएको छ। ती कार्यक्रममार्फत २ लाख ८० हजार १५० जना प्रत्यक्ष लाभान्वित भएका जनाएको छ ।

दुर्घटना न्यूनीकरण अभियानअन्तर्गत १४० जना चालकको स्वास्थ्य परीक्षण गरिएको छ। साथै लागूऔषध सेवन गरी सवारी चलाएको पाइएपछि ३१ जना चालकमाथि कानुनी कारबाही गरिएको प्रहरीले जनाएको छ ।

प्रहरीले पृथ्वी राजमार्ग तथा जिल्लाका मुख्य सडकखण्डमा नियमित ट्राफिक निगरानी, सवारीको प्राविधिक परीक्षण, जोखिमयुक्त क्षेत्रको पहिचान तथा दुर्घटना न्यूनीकरणका कार्यक्रमलाई आगामी वर्ष पनि थप प्रभावकारी बनाइने जनाएको छ ।