कृष्णभीर सडक: ट्रायलका रूपमा एकतर्फी गाडी सञ्चालन

धादिङ। पृथ्वी राजमार्गअन्तर्गत धादिङको बेनिघाट रोराङ गाउँपालिका-७ स्थित अवरुद्ध कृष्णभीर सडक सञ्चालनमा आएको छ।

भोटेकोशी हुँदै त्रिशूली नदीमा आएको बाढीले सडकको तल्लो क्षेत्र कटान गरेपछि भदौ १४ गते सडक भासिएको थियो।

सडक भासिएकै कुना भागमा भित्तो कटान गरेर नयाँ ट्रयाक खोली आजदेखि सडक पुनः सञ्चालनमा ल्याइएको हो।

आज ग्यास बुलेटहरू कृष्णभीर सडक पार गराइएको नागढुङ्गा–मुग्लिन सडक आयोजनाका कन्सल्टेन्ट फिल्ड इन्जिनियर अशोक देवकोटाले जानकारी दिनुभयो।

तत्कालका लागि ग्यास बुलेट, ट्रकहरू मात्र सञ्चालन गरिनेछ।

सडकको अवस्था परीक्षण गर्न ट्रायलका रूपमा एकतर्फी गाडी सञ्चालनमा ल्याइएको र सडकको अवस्था हेरेर यातायातलाई थप सहज बनाइने उहाँको भनाई छ।

सडकको ग्राभेलिङ र कम्प्याक्सनको काम भने अझै बाँकी छ।