बाढीपछि जनजीवन सामान्य बनाउन धादिङ उद्योग वाणिज्य संघको ९ बुँदे माग,पुलदेखि बैंक कर्जासम्म

धादिङ । भदौ १० गते आएको बाढीबाट भएको जनधन तथा भौतिक क्षतिको पुनःस्थापना र जनजीवन सामान्य बनाउन माग गर्दै धादिङ उद्योग वाणिज्य संघले सरकारसमक्ष ९ बुँदे मागसहित ज्ञापनपत्र बुझाएको छ।

संघले मंगलबार जिल्ला प्रशासन कार्यालय धादिङमार्फत नेपाल सरकारलाई ज्ञापनपत्र बुझाएको हो।

संघका अध्यक्ष रामकुमार डल्लाकोटीको नेतृत्वको टोलिले बाढीबाट प्रभावित उद्योगी, व्यवसायी, किसान तथा सर्वसाधारणका समस्या तत्काल सम्बोधन गर्न ज्ञापनपत्र मार्फत सरकारको ध्यानाकर्षण गराएको छ।

बाढीबाट गल्छी, गजुरी, बेनीघाट रोराङ र सिद्धलेक गाउँपालिका बढी प्रभावित भएको उल्लेख गर्दै संघले सडक, पुल, विद्युत, खानेपानी, विद्यालय, स्वास्थ्य संस्था तथा निजी संरचनामा पुगेकाले क्षतिको शिघ्र पुनःस्थापना गर्न माग गरेको छ।

सरकारी विवरणअनुसार यी चार पालिकामा उद्योग तथा वाणिज्य क्षेत्रमा मात्रै करिब ४५ करोड ८४ लाख रुपैयाँ बराबरको क्षति भएको उल्लेख गर्दै संघले वास्तविक क्षति अझ ठूलो हुन सक्ने जनाएको छ।

घर तथा घरायसी सामग्री, कृषि, पशुपालन, सरकारी संरचना तथा पर्यटन क्षेत्रमा भएको क्षतिसमेत समेटेर विस्तृत क्षति मूल्याङ्कन गर्न संघले माग गरेको छ।

आगामी दशैं–तिहारजस्ता प्रमुख चाडपर्व नजिकिँदै गर्दा सडक तथा पुलको अवस्था सुधार गरी यातायात, आपूर्ति तथा व्यापारिक गतिविधि सहज बनाउन तत्काल पहल गर्नुपर्नेमा संघले जोड दिएको छ।

ज्ञापनपत्रमा संघले सरकारसमक्ष निम्न ९ बुँदे माग राखेको छ :

१. बैंक कर्जा तथा ब्याजमा सहुलियत र पुनर्संरचना।

२. न्यूनतम विद्युत महसुलमा छुट।

३. करमा छुट, राजस्व सहुलियत र बीमा सहजीकरण।

४. वैकल्पिक सडकको तत्काल स्तरोन्नति तथा पुनर्निर्माण।

५. धादिङबेँसी जोड्ने पुलको तत्काल अस्थायी निर्माण।

६. पुनःस्थापना, पुनर्निर्माण र पुनर्लाभका कार्य।

७. आपतकालीन राहत तथा पुनर्लाभ कोष स्थापना।

८. कृषि, पशुपन्छी तथा दैनिक जीविकोपार्जनमा क्षतिपूर्ति।

९. अस्थायी आवास, स्वास्थ्य, खानेपानी तथा शिक्षा पूर्वाधार पुनःस्थापना।

यसैगरी संघले जोखिमयुक्त बस्तीको पुनर्वास तथा पुनःस्थापना, नदी कटान नियन्त्रणका लागि तटबन्ध निर्माण, अभिभावक गुमाएका बालबालिकाको संरक्षण तथा शिक्षा, प्रभावित परिवारका सदस्यलाई रोजगारी र विपद्मा ज्यान गुमाएका नागरिकको मृत्युदर्तालगायतका कानुनी प्रक्रिया सहज बनाउन समेत सरकारको ध्यानाकर्षण गराएको छ।

प्रभावित क्षेत्रको वास्तविक अवस्था बुझ्न सम्बन्धित निकायको उच्चस्तरीय टोली धादिङ पठाई तत्काल निर्णय तथा कार्यान्वयन गर्न पनि संघले आग्रह गरेको छ।

ज्ञापनपत्र बुझाउने कार्यक्रममा धादिङ उद्योग वाणिज्य संघका पदाधिकारी तथा सदस्य, नागरिक समाजका प्रतिनिधि, सञ्चारकर्मी तथा स्थानीय व्यवसायीहरूको सहभागिता रहेको थियो।