धादिङमा बाढीले बगाउँदा एक महिलाको मृत्यु

धादिङ। बेनीघाट रोराङ गाउँपालिका-२ स्थित खानीखोलामा आएको बाढीले बगाउँदा एक महिलाको मृत्यु भएको छ।

ताल्तीबाट घरतर्फ जाने क्रममा खानीखोलामा आएको बाढीमा परेर अन्दाजी ५५ वर्षीया महिला सुकुमाया चेपाङको मृत्यु भएको हो।

उनलाई स्थानीयको सहयोगमा उद्धार गरी थप उपचारका लागि मलेखुस्थित टिचिङ अस्पताल लगिएको भए पनि उपचारका क्रममा उनको मृत्यु भएको जिल्ला प्रहरी कार्यालय धादिङका सूचना अधिकारी डीएसपी प्रकाश दाहालले जानकारी दिनुभयो।

लगातारको वर्षाका कारण स्थानीय खोलाहरूमा पानीको बहाव बढेकाले ग्रामीण क्षेत्रमा आवतजावत जोखिमपूर्ण बनेको छ।