फेरि ठूलो पानी पर्ने हल्लाका पछि नलाग्न महाशाखाको आग्रह

काठमाण्डौ । अहिले सामाजिक सञ्जालमा फेरि यही असोज १७ गतेदेखि लगातार ३ दिन ठूलो वर्षा हुने चर्चा र हल्ला फैलिएको छ। गएको बुधबारदेखि आइतबारसम्म देशका धेरै ठाउँमा झरी परेको थियो ।

लगत्तै अर्को ठूलो वर्षाबारे हल्ला फैलिएको हो ।जल तथा मौसम विज्ञान विभाग, मौसम पूर्वानुमान महाशाखाले यस्ता हल्लाको पछि नलाग्न र मौसमसम्बन्धी अध्यावधिक सूचना तथा बुलेटिन हेर्न आग्रह गरेको छ ।

अबको मौसमबारे चासो र खोजी बढेपछि आधिकारिक निकायले अहिले आइरहेका हल्ला निराधार रहेका भन्दै खण्डन समेत गरेको छ ।

महाशाखाले तत्काल त्यस्तो कुनै पनि ठूलो वर्षाको पूर्वानुमान नरहेको र तथ्यहीन खबरकोपछि नलाग्न अनि यस्ता अफवाह नफैलाउन पनि अनुरोध गरेको छ ।

अब तत्काल ठूलो र लगातार पानी पर्ने सम्भावना नरहेको मौसम पूर्वानुमान महाशाखाले जनाएको छ ।