गलौँदीमा आज राति सडक बन्द हुने

धादिङ। पृथ्वी राजमार्गअन्तर्गत धादिङको गजुरी गाउँपालिका- ५ गलौँदीमा आज राति सडक बन्द हुने भएको छ।

जिल्ला प्रशासन कार्यालय धादिङले एक सूचना जारी गर्दै सडक मर्मतका लागि आज राति ११ बजेदेखि भोलि बिहान ५ बजेसम्म सडक बन्द रहने जानकारी गराएको हो।

त्रिशूली नदीको कटानका कारण भासिएको सडकमा यसअघि भित्तो काटेर सञ्चालनमा ल्याइएको थियो।

त्यहाँ थप मर्मत गर्नुपर्ने भएकाले आज राति गाडी आवागमन पूर्णरूपमा बन्द गर्न लागेको प्रशासनले जनाएको छ।

अहिले दशैँको समय पनि भएकोले पृथ्वी राजमार्गमा गाडीको चाप अत्यधिक छ।

यो बेला पानी परिहालेमा हिलोमा गाडी फस्ने जोखिम उच्च रहेकोले अहिले नै मर्मत गर्न लागेको सडक विभागले जनाएको छ।