धादिङ अस्पतालको ४६ औँ बार्षिकोत्सव : प्रेषण केन्द्र उद्घाटन,ग्रामिण टेलिकार्डोलोजी सेवा शुभारम्भ

धादिङ,२६ मंसिर ।
धादिङ अस्पतालले आफ्नो स्थापनाको ४६ औं बार्षिकोत्सवमा बिविध कार्यक्रम गरी मनाएकोे छ ।

सोमवार अस्पतालमा आयोजित बार्षिक उत्सव समारोह कार्यक्रमका बिच अस्पतालमा ग्रामिण टेलिकार्डोलोजी सेवा शुभारम्भ गरिएको छ भने असल छिमेकी नेपालको सहयोगमा अस्पतालमा संचालित प्रेषण केन्द्र उद्घाटन गरिएको छ ।

बागमती प्रदेशका स्वास्थ्य मन्त्री निमा लामाले उद्घाटन गर्नुभएको हो । कार्यक्रमका प्रमुख अतिथि मन्त्री लामाले प्रदेश सरकारले स्वास्थ्य क्षेत्रमा ठुलो लगानी गरेको भन्दै धादिङ अस्पतालको विकासको लागि आफु प्रतिबद्ध रहेको बताउनुभयो । अस्पतालले धेरै राम्रो काम गरीरहेकोले आगामी दिनमा पनि सहयोग गर्ने बताउनुभयो ।

अस्पताल व्यवस्थापन समितिका अध्यक्ष महेन्द्र धमलाको अध्यक्ष्यता भएको कार्यक्रममा मन्त्री लामाको प्रमुख आतिथ्य तथा धादिङबाट नवनिर्वाचित प्रदेश सांसद गोविन्द लम्साल, जिसस धादिङका प्रमुख नवराज अधिकारी,उपप्रमुख कुलमान विक, नीलकण्ठ नगरपालिकाका उपमेयर दिपक विश्वकर्माको बिशेष आतिथ्य रहेको थियो । साथै कार्यक्रममा बिभन्न संघसंस्थाका प्रमुख एवम प्रतिनिहरुको आतिथ्य रहेको थियो ।

कार्यक्रममा अस्पताल व्यवस्थापन समितिका अध्यक्ष धमला, निमित्त मेडिकल सुपरिटेन्डेन्ट डा.मधुकर दाहाल र सूचना अधिकारी विक्रम वि.कले अस्पतालको प्रगति विवरण प्रस्तुत गर्नुभएको थियो ।कार्यक्रमको अवसरमा विभिन्न समयमा संचालित खेलकुद कार्यक्रमहरुमा उत्कृष्ट हुनेलाई सम्मान गरिएको थियो ।

साथै लामो समय काम गरेका कर्मचारीहरु, अस्पतालको सेवामा उत्कृष्ट काम गर्ने कर्मचारी, अस्पताललाई सहयोग गर्ने संघ सस्था र सेवा निवृत कर्मचारीहरुलाइ प्रमाणपत्रद्धारा सम्मान गरिएको थियो । सोही अवसरमा सास्कृतिक कार्यक्रम समेत गरिएको थियो । अस्पतालको बार्षिक उत्सवकै अवसरमा आईतबार आयोजित रक्तदान कार्यक्रममा ३८ जनाले रक्तदान गरेका छन् ।

यसैगरी अस्पतालमा नागरिक सहायता कक्ष तथा अस्पताल सुरक्षागार्ड कक्ष भवन उद्घाटन गरिएको छ । धादिङ अस्पताल तथा धादिङ सोसियल भोलेन्टियर नेपालको सहकार्यमा निर्माण गरिएको उक्त नागरिक सहायता कक्ष तथा अस्पताल सुरक्षागार्ड कक्षबाट नागरिकहरुले सहज रुपमा सेवा लिन पाउने अस्पतालले जनाएको छ ।

पछिल्लो समय धादिङ अस्पतालमा बिभिन्न जटिल रोगको उपचार र शल्यक्रियासमेत हुन थालेको छ । पहिले अस्पतालमा पर्याप्त स्रोतसाधन र जनशक्तिको व्यवस्थापन नहुँदा असामान्य उपचारका लागि पनि अन्यत्र धाउनुपर्ने रहेको थियो । अहिले अस्पतालले आफ्नो सेवा विस्तार गरेको छ । अस्पतालले गम्भीर प्रकृतिका हाडजोर्नी अप्रेसन, हेमो डायलासिससमेत गर्न थालेको छ ।

चारवटा भेन्टिलेटरसहित १० शैय्याको आईसीयु,सुविधा सम्पन्न ईमरजेन्सी कक्ष, दक्ष चिकित्सक र अत्याधुनिक प्रयोगशाला विस्तार गरेको छ । पर्याप्त भौतिक संचरना र दक्ष जनशक्तिको अभावका बीचपनि अस्पतालले अहिले सिएस सेवादेखि डेन्टल र फिजियोथेरापीसम्मको सेवा प्रवाह गरिरहेको छ ।

५० शैयाको अनुमति पाएको अस्पतालले अहिले ८५ वटा बेडमा उपचार गरिरहेको छ । दैनिक २ सय ५० भन्दा बढी बिरामीलाई सेवा दिइरहेको अस्पतालमा ७ विशेषज्ञ चिकित्सक र १५ मेडिकल अधिकृत छन् ।