धादिङ अस्पतालका अध्यक्ष रिजालद्धारा पदभार ग्रहण,यस्ता छन् चार प्रतिवद्धता

धादिङ,०३ पौष ।
धादिङ अस्पतालको व्यवस्थापन समितिका अध्यक्ष राजाराम रिजालले पदभार ग्रहण गरेका छन् ।

बागमती प्रदेश सरकार प्रदेश स्वास्थ्य सेवा अध्यादेशको दफा २६ ख बमोजिम काम कर्तव्य र अधिकार सम्पादन गर्न सोही अध्यादेशको दफा २६ क उपदफा ८ बमोजिम पदावली कायम हुने गरि बिहिबारदेखी अध्यक्षमा नियुक्त भएका रिजालले आज पदभार ग्रहण गरेका हुन् । अध्यक्षमा पदभार ग्रहण गरेसँगै अध्यक्ष रिजालले बिभिन्न चार बुँदे प्रतिवद्धता गरेका छन् ।

उनले अस्पतालमा ५ बेडको सघन उपचार कक्ष (आसियु) तत्काल सञ्चालन संचालनमा ल्याउने, हाल ५० बेडमा संचालित अस्पताललाई १०० बेडमा स्तरोन्नति गर्ने प्रतिवद्धता गरेका छन् । त्यस्तै २०० बेड क्षमताको अस्पतालको मूल भवन तत्काल डीपीआर गरी निर्माण कार्य अगाडी बढाउने र धादिङ अस्पतालमा सिटी स्क्यान सेवा उपलब्ध गराउने प्रतिवद्धता गरेका छन् ।

पदभार ग्रहण कार्यक्रममा अस्पतालका निमित्त मेडिकल सुपरिटेन्डेन्ट डा. मधुकर दाहालले नव नियुक्त अध्यक्ष रिजाललाई स्वागत गरेका थिए भने निवर्तमान अध्यक्ष महेन्द्र धमलाई मायाँको चिनो सहित विदाई गरेका थिए ।