संचालनमा आयो धादिङमा जिल्ला सहकारी बजार : किसानलाई उचित,उपभोक्तालाई सुलभ मुल्य

धादिङ,१५ पौष ।
धादिङबेसीमा जिल्ला सहकारी बजार संचालनमा आएको छ । कृषि ज्ञान केन्द्र र सहकारी संघ धादिङको समन्वयमा नीलकण्ठ–३ धादिङबेसीस्थित प्रहरीचोकमा जिल्ला स्तरीय सहकारी बजार संचालनमा आएको हो ।

विहिबार एक कार्यक्रमका बिच सहकारी संघका केन्द्रिय अध्यक्ष मीनराज कँडेलले उक्त सहकारी बजारको उद्घाटन गर्नुभएको हो । सहकारी बजार विकास कार्यक्रम सिएमडिपीको ७० लाख ८५ हजार लागतमा संरचना निर्माण तथा मर्मत गरी जिल्ला सहकारी बजार संचालनमा आएको हो ।

कार्यक्रममा राष्ट्रिय सहकारी महासंघका अध्यक्ष कडेंलले सहकारी बजार संचालन गर्नु मात्रै ठुलो कुरा नभई यसलाई निरन्तरता दिनु महत्वपुर्ण रहेको बताउनुभयो ।

सहकारी बजारबाट धादिङको १३ वटै स्थानिय तहमा उत्पादन भएका फलफूल, तरकारी र दूधजन्य वस्तुको बिक्रि गरिनुको साथै अन्य ठाउँमा पनि बजारिकरणको लागि सहजीकरण गर्ने योजना रहेको धादिङ जिल्ला सहकारी संघका अध्यक्ष रामचन्द्र आचार्यले बताउनुभयो ।

उहाँले जिल्लाभरका किसानहरुले उत्पदान गरेका कृषिउपज विक्रि गर्दा किसानले उचित मुल्य पाउने र उपभोक्ताले सुलभ मुल्यमा खरिद गर्न सकिने भएकोले बजार संचालन गरिएको बताउनुभएको छ ।