धादिङको त्रिपुरासुन्दरी गाउँपालिकामा उच्च शिक्षा निशुल्क

धादिङ,१७ माघ ।

धादिङको त्रिपुरासुन्दरी गाउँपालिकाले उच्च शिक्षा निःशुल्क गर्ने भएको छ । गाउँपालिकाले निशुल्क शिक्षा सम्बन्धी कार्यबिधी २०७९ बनाएर कक्षा ११, १२ र उच्च शिक्षा निःशुल्क बनाएको हो ।

गाउँपालिकाले शुल्क बेहोर्न थालेपछि बिद्यार्थीले निशुल्क पढ्न पाएका छन। आर्थिक अभावका कारण बिचमै पढाई छोड्ने दर घटाउन र शिक्षामा सबैको पहुँच बढाउने उद्देश्यले गाउँपालिकाले निशुल्क शिक्षा प्रदान गरेको गाउँपालिकाले जनाएको छ ।

त्रिपुरासुन्दरी गाउँपालिका भित्रका ११ वटा मावि र २ वटा क्याम्पस मा अध्ययन गर्ने ६ सय ७५ जनाले निशुल्क शिक्षा लिईरहेका त्रिपुरासुन्दरी गाउँपालिकाका शिक्षा शाखा प्रमुख तथा शिक्षा युवा तथा खेलकुद शाखाका श्रोत व्यक्ती नवराज पाठकले जानकारी दिनुभयो ।

गाउँपालिकाले कक्षा ११ र १२ विद्यार्थीहरुको लागि माशिक ५ सय र क्याम्पसको लागि मासिक ७ सय रुपैँया खातामा जम्मा गर्ने गरेको पाठकको भनाई छ । धादिङमा उच्च शिक्षा निशुल्क बनाउने त्रिपुरासुन्दरी गाउँपालिका जिल्लामै पहिलो स्थानिय तह बनेको छ ।