करेन्ट लगाइ माछा मार्ने धादिङका चार जना पक्राउ

धादिङ,०७ बैशाख।
दरौँदी नदीमा करेन्ट लगाइ माछा मार्ने धादिङका चार जना पक्राउ परेका छन् ।

जिल्ला प्रहरी कार्यालय गोरखाले प्रहरीले गस्ती गर्ने क्रममा स्थानीय तहसँग समन्वय गरी सिरानचोक गाउँपालिका–७ ओडारेस्थित दरौँदी नदीमा करेन्ट लगाएर माछा मारिरहेका बेला गएराती चारजनालाई पक्राउ गरेको हो ।

पक्राउ पर्नेमा धादिङ त्रिपुरासुन्दरी गाउँपालिका–२ घर भएका २८ वर्षका लीलामान कुमाल, २६ वर्षका सरोज कुमाल, राहुल कुमाल र रचिन कुमाल रहेको गरिएको प्रहरी नायब उपरीक्षक लीलाराज लामिछानेले जानकारी दिनुभयो ।

उनीहरुले राति १ः३० बजे ब्याट्रीमार्फत करेन्ट प्रवाह गरी माछा मार्दै गरेको अवस्थामा उनीहरुलाई पक्राउ गरिएको उहाँले बताउनुभयो ।

पक्राउ परेकाको साथबाट करेन्ट प्रवाह गरी माछा मार्न प्रयोग गरिएकोे १२ भोल्टको ब्याट्री, करेन्ट प्रवाह गर्ने भाटा, माछा थाप्न बनाइएको जाली र माछा राख्न बनाइएको फुर्लुङसमेत बरामद गरिएको उपरीक्षक लामिछानेले बताउनुभयो ।