ठगी अभियोगमा धादिङका अजय र गोरखाका छिमी पक्राउ

स्लोवेनिया पठाइदिन्छु भन्दै ठगी गरेको अभियोगमा २ जना पक्राउ परेका छन्।

२ लाख ८० हजार रूपैयाँ ठगी गरेको अभियोगमा धादिङ घर भई काठमाडौं चन्द्रागिरी नगरपालिका–१३ बस्ने २५ वर्षीय अजय राज शाही र गोरखा चुमनुव्री गाउँपालिका–४ घर भएकी ३५ वर्षीया छिमी सुनिन पक्राउ परेका हुन्।

मंगलबार काठमाडौं उपत्यका अपराध अनुसन्धान कार्यालय मिनभवनबाट खटिएको प्रहरीले नैकापबाट पक्राउ गरेको हो।

उनीहरूले १ जनालाई वैदेशिक रोजगारीका लागि स्लोवेनिया पठाई फ्याक्ट्रीमा मासिक ७० हजार रूपैयाँ तलबमा काम लगाइदिन्छु भन्दै प्रलोभनमा पारी पीडितबाट पटकपटक गरी उक्त रकम ठगी गरेका थिए।

उनीहरूलाई थप अनुसन्धान तथा कारबाहीको लागि वैदेशिक रोजगार विभाग ताहाचल काठमाडौं पठाइएको छ।