धादिङमा बालविवाह गरेको कसुरमा एक बालकलाई १ वर्ष कैद,१० हजार जरिवाना

अडियोमा सुन्नुहोस

धादिङ । धादिङमा बालविवाह गरेको कसुरमा एक बालकलाई १ वर्ष कैद र १० हजार जरिवाना गरिएको छ।

जिल्ला अदालत धादिङका जिल्ला न्यायाधीश गोपाल प्रसाद बास्तोलाको पुस २२ गते आईतबारको इजलासले १३ वर्षीया बालिकालाई बालविवाह गरेको भन्दै १५ वर्षीय बालकलाई १ वर्ष कैद र १० हजार जरिवाना गर्ने फैसला गरेको हो ।

बालक र बालिका भागेर बालविवाह गरेकोले कसुर कायम गर्दै सो फैसला गरिएको अदालतका श्रेस्तेदार माधव भण्डारीले जानकारी दिनुभयो।

०८० असोज २५ गते जिल्ला अदालतमा जबरजस्ती करणी सम्बन्धी मुद्दा दर्ता भएको थियो ।

दुवै जना बालक भएको र राजिखुसि भागेर विवाह गरी बच्चासमेत जन्मेकाले घटना जबरजस्ती करणी नभई कानुनले प्रतिबन्ध लगाएको बाल विवाह गरेको कसुर कायम गरी बालकलाई एक वर्ष कैद गर्ने फैसला भएको श्रेस्तेदार भण्डारीले बताउनुभयो ।

१६ वर्ष मुनीको बालक भएकोले मुलुकी अपराध संहिता २०७४ को ७३(३) सजाय गरिएकोमा आधा सजाय गरिएको छ ।

दुबैजनाबाट बच्चा जन्मेको अवस्थामा बालविवाह गर्न कानुनले प्रतिबन्ध लगाएकोले सामाजिक परम्परा भएपनि कसुरबाट उन्मुक्ति पाउन नसक्ने श्रेस्तेदार भण्डारीको भनाइ छ ।

०७९ माघ १५ गते घटना भएको भन्दै ०७९ असोज १५ गते इलाका प्रहरी कार्यालय गजुरीमा उजुरी परेको थियो ।

सोहिदिन पीडितको धादिङ अस्पतालमा स्वास्थ्य परीक्षण भएको र आरोपितलाई सोहिदिन गिरफ्तार गरी हिरासतमा राखिएकोमा अदालतको आदेश बमोजिम असोज २५ गतेदेखि बाल सुधार गृहमा राखिएको छ ।