महिलालाई १० हजारमा बिक्री गर्ने धादिङका वीरबहादुर ३२ वर्षपछि पक्राउ

धादिङ । मानबबेचविखनको आरोपमा धादिङका वीरबहादुर तामाङ ३२ वर्षपछि पक्राउ परेका छन्।

बुधबार मानव बेचबिखन अनुसन्धान ब्युरोको टोलीले धादिङको नेत्रावती डवजोङ गाउँपालिका–२ का ५७ वर्षीय तामाङलाई ललितपुर महानगरपालिका–१४ तिखेदेवलबाट पक्राउ गरेको हो।

आरोपी तामाङले पीडितको श्रीमान बैदेशिक रोजगारीका क्रममा ब्रुनाईमा रहेका वेला महिलालाई २०४७ साल चैतमा झुक्यानमा पारी भारतमा लगेर बेचेका ब्यूरोका प्रहरी उपरीक्षक कृष्णप्रसाद पंगेनीले जानकारी दिनुभयो ।

पीडितलाई तिम्रा श्रीमानले ब्रुनाई ल्याइदिनु भनी चिठी पठाएको बताएर महिलालाई भारतमा लगी बेचेको पाइएको प्रहरी उपरीक्षक पंगेनीले बताउनुभयो ।

उनले महिलालाई काठमाडौँबाट काँकडभिट्टा हुँदै पश्चिमबंगाल पु¥याई भारतीय नागरिकलाई बेचेका थिए। तामाङले १० हजार भारतीय रुपैयाँमा पीडितलाई बेचेका खुलेको छ।

भारतीय नागरिकले रिक्सामा राखी लैजाने क्रममा पीडित महिला रिक्साबाट हामफाली भागेर भारतीय प्रहरीको सम्पर्कमा पुगेकी थिइन्। त्यसपछि भारतीय प्रहरीले काँकडभिट्टा ल्याएर छाडिदिएपछि काठमाडौँ आएर उनले ब्यूरोमा जाहेरी दिएकी थिइन्।

घटनामा संलग्न अन्य अभियुक्तको खोजी जारी रहेको प्रहरी उपरीक्षक पंगेनीले बताउनुभयो।