झुठ्ठा विवरण पेश गरी नागरिकता बनाई दिने धादिङका दुईसहित चारजना पक्राउ

अडियोमा सुन्नुहोस

धादिङ । झुठ्ठा विवरण पेश गरी नागरिकता बनाई दिने कार्यमा संलग्न रहेको अभियोगमा ४ जना पक्राउ परेका छन् ।

पक्राउ पर्नेहरूमा धादिङ नेत्रावती डवजोङ गाउँपालिका-१ घर भई हाल काठमाडौं महानगरपालिका-१० मनमैजु बस्ने ३१ वर्षीय मदन बहादुर तामाङ, धादिङ खनियाबास गाउँपालिका-५ घर भई हाल काठमाडौं सोह्रखुट्टे बस्ने ५६ वर्षीय रामेश्वर रिजाल, चीनको तिब्बतस्थित हिन्दे घर भई हाल काठमाडौं महानगरपालिका-६ महांकाल बस्ने ५३ वर्षीय छिरिङ ढुन्डुप र सिन्धुपाल्चोक हेलम्बु गाउँपालिका-४ घर भई हाल काठमाडौं गोकर्णेश्वर नगरपालिका-८ बस्ने ४६ वर्षीय छिरिङ् वाङ्दीन शेर्पा रहेका छन् ।

काठमाडौं बौद्धको तीनचुलीस्थित एक घरमा ४ असोजमा छापा मारेर जुवा खेल्दै गरेको अवस्थामा प्रहरीले ७ जनालाई पक्राउ गरेको थियो । पक्राउ परेकामध्ये चार तिब्बती, दुई नेपाली र एक भारतीय नागरिक थिए ।

उनीहरुमध्ये सोनाम नाम गरेका तिब्बती नागरिकको साथबाट जिल्ला प्रशासन कार्यालय धादिङबाट जारी भएको नागरिकता फेला परेको प्रहरीको भनाइ छ ।

सोनामको साथबाट बरामद भएको जिल्ला प्रशासन कार्यालय धादिङ, ना.प्र.न. २६-०१-८१-०३२१७ को नेपाली नागरिकता सम्बन्धमा अनुसन्धान गर्दै जाँदा उक्त नागरिकता छिरिङ ढुन्डुपले नगद ४ लाख रूपैयाँमा बनाई दिएको भन्ने खुल्न आएको हो ।

बरामद नागरिकता सक्कल रहेको पाइएपछि नागरिकता बनाउन भूमिका खेलेको आरोपमा अरु चार जनालाई पक्राउ गरेर सोनामसहित पाँचै जनालाई जिल्ला प्रहरी कार्यालय धादिङ पठाइएको प्रहरीले जनाएको छ ।

पक्राउ परेकामध्ये रिजाल लेखापढी व्यवसायी हुन् । उनले काठमाडौंबाट कागजात मिलाएर धादिङ पठाएको र धादिङमा मदनबहादुरले तिब्बती नागरिकको उपस्थितिबिनै नेपाली नागरिकता निकालेको प्रहरी अनुसन्धानबाट खुलेको छ ।

नेपाली नागरिकता लिन तिब्बती नागरिक सोनामले चार लाख रुपैयाँ छिरिङ ढुन्डुपलाई बौद्धमा भेटेर बुझाएको प्रहरीले फेला पारेको छ ।सोनामले नेपाली नागरिकताका साथै, राष्ट्रिय परिचय पत्र र राहदानी बनाउन भनेर चार लाख रुपैयाँ बुझाएका थिए ।

चार लाखमध्ये ५० हजार रुपैयाँ आफूले राखेर ढुन्डुपले तीन लाख ५० हजार छिरिङ वाङ्दिनलाई दिएको अनुसन्धानबाट खुलेको छ । छिरिङ वाङ्दिनले पनि ५० हजार रुपैयाँ राखेर तीन लाख रुपैयाँ लेखापढी गर्दै आएका रामेश्वर रिजाललाई दिएको पाइएको अपराध अनुसन्धान कार्यालयका एसएसपी सानुराम भट्टराईले जानकारी दिनुभयो ।

छिरिङ वाङ्दिनले आफूले राखेको ५० हजार रुपैयाँमध्ये ५ हजार रुपैयाँ आफूलाई राखेर सोनामको राष्ट्रिय परिचयपत्र बनाउन भन्दै पुनः रिजाललाई दिइएको खुलेको छ ।

यसरी जम्माजम्मी तीन लाख ४५ हजार रुपैयाँ बुझेपछि लेखापढी व्यवसायी रिजालले एक लाख ४५ हजार रुपैयाँ आफूसँग राखेर २ लाख रुपैयाँ मदनबहादुरलाई दिएको पाइएको प्रहरीको भनाइ छ ।

उनै मदनबहादुरले जिल्ला प्रशासन कार्यालय धादिङबाट ६ असार २०८१ मा सोनाम तामाङ नाममा तिब्बती सोनामको नागरिकता निकालेको प्रहरीले बताएको छ ।

मदनबहादुरले भने आफूले प्राप्त गरेको दुई लाखमध्ये एक लाख ५० हजार रुपैयाँ राखी ५० हजार रुपैयाँ प्रशासनका कर्मचारीलाई दिएको बयान प्रहरी समक्ष दिएका छन् । अनुसन्धानकै क्रममा रहेको भन्दै ५० हजार रुपैयाँ बुझ्ने कर्मचारीको नाम भने प्रहरीले सार्वजनिक गरेको छैन ।

धादिङको नेतावती डबजोङ गाउँपालिकाका हर्कमान तामाङलाई सोनामको बाबु बनाएर नागरिकता लिइएको पाईएको हो।

नागरिकता लिने मान्छेलाई समेत उपस्थित नगराई नक्कली बुवा खडा गरेर नागरिकता लिएपछि यसमा कर्मचारीको मिलेमतो देखिएको प्रहरी अधिकारीहरु बताउँछन् ।

यसबारेमा अनुसन्धान गर्न भन्दै अपराध अनुसन्धान कार्यालयले सम्पूर्ण कागजातसहित पक्राउ परेकाहरुलाई धादिङ पठाएको छ ।