नलाङ पात्ले माविको वार्षिकोत्सवमा भोलिदेखी श्रीमद भागवत ज्ञान महायज्ञ

धादिङ,१९ फागुन।
सिद्धलेक गाउपालिका–२ मा रहेको नलाङ पात्ले माध्यमिक विद्यालयको वार्षिकोत्सवमा भोलि शनिबारदेखी श्रीमद्भागवत ज्ञान महायज्ञ हुने भएको छ।

विद्यालयको ६० औँ वार्षिकोत्सवको अवसरमा भोलि शनिबारदेखी २३ गतेसम्म हिरक जयन्ती, श्रीमद भागवत ज्ञान महायज्ञ तथा विविध कार्यक्रम हुन लागेको विद्यालयका सहायक प्रधानाध्यापक अमृत गुरुङ(तिलक)ले जानकारी दिनुभयो।

उदघाटनका लागि बागमती प्रदेशका मुख्यमन्त्री शालिकराम जम्कटेल आउने तय भएकोे गुरुङले बताउनुभयो।

२० गते उदघाटन हुने महायज्ञमा फागुन २३ गतेसम्म कथा वाचन, झाँकी, धनधान्चल, तुलादान तथा बिबिध सांस्कृतिक लगाएतका कार्यक्रम हुने गुरुङले बताउनुभयो। महायज्ञमा पण्डित वालकृष्ण अर्यालले कथा वाचन गर्नुहुनेछ ।

महायज्ञबाट संकलित रकमबाट दिवा छात्रावास तथा विपन्न,अनाथ र जेहेन्दार विद्यार्थीको लागि छात्रवृत्ति कोष स्थापना गर्ने, १ देखि कक्षा ५ सम्मका विद्यार्थीहरुलाई निशुल्क बिहानी कक्षा सञ्चालन गर्ने, सहुलियत दरमा खाना तथा खाजाको व्यवस्था गर्ने विद्यालयका प्रधानाध्यापक रमेशमान श्रेष्ठले जानकारी दिनुभयो।

महायज्ञमा दानवीर दाताहरुलाई कार्यक्रमको नियमअनुसार जिवनी लेखन, प्रमाणपत्रद्धारा सम्मान गर्ने श्रेष्ठले बताउनुभयो। महायज्ञ सञ्चालनका लागि व्यक्तिगत रुपमा सहयोग जुट्ने क्रम जारी रहेको श्रेष्ठले बताउनुभयो।