आजदेखि नेपाल संवत् ११४४ शुरु,नेवार समुदायले आज म्हःपूजा मनाउदै

नेपाल संवत् ११४४ आजदेखि शुरु भएको छ ।

नेवार समुदायले नयाँ वर्षका रुपमा मनाउने नेपाल संवत् आज देशभर विविध कार्यक्रम गरी मनाइँदैछ ।

राष्ट्रिय विभूति शङ्खधर साख्वाले विसं ९३७ सालमा गरिब नागरिकको ऋण मोचन गरी नेपाल संवतकाे शुरुवात गर्नु भएको  थियो ।

नेपाल संवतले पृथ्वीनारायण शाहको शासनकालसम्म राष्ट्रिय संवतकाे मान्यता पाएको थियो ।

विसं २००७ मा प्रजातन्त्रको स्थापना भएदेखि नै नेपाल संवतलाई राष्ट्रिय मान्यताका लागि अभियान चलाइएको छ ।

काठमाण्डाै, ललितपुर, भक्तपुर, बनेपा, धुलीखेल, बाह्रबिसे, दोलखा भीमेश्वर लगायत नेवार समुदायको बाहुल्यता रहेका ठाउँमा नेपाल संवतकाे अवसरमा विशेष कार्यक्रम हुँदैछ ।

सरकारले सरकारी कागजातमा विक्रम संवतसँगै नेपाल संवत् समेत उल्लेख गर्ने निर्णय गरेको छ ।

यसैगरी आज नेवार समुदायमा  म्हः अर्थात् (आत्म) पूजा गरिन्छ ।

कार्तिक शुक्ल प्रतिपदाका दिन आज नेवार समुदायका व्यक्तिहरुले आफ्नो आत्म  (म्हः) पूजा पर्व मनाउने गर्दछन् ।

भक्तपुरका नेवार समुदायले यस वर्ष पञ्चाङ्ग निर्णायक समितिले निर्धारण गरेको मितिभन्दा एक दिन अगाडि म्ह: पूजा मनाएका छन् । यस्तै, आज भाइटीका मनाउँदै छन् ।

यस्तै, ललितपुरका केही नेवार समुदायले पनि आजै भाइटीका गर्दैछन्।

भक्तपुर नगरपालिकाले सार्वजनिक सूचना नै निकालेर २७ गते हिजो म्ह: पूजा र २८ गते आज भाइटीका मनाउन आह्वान गरेको थियो।