विवाहको लागि अनिवार्य रुपमा वडाको सिफारिस लिनुपर्ने

बालविवाह हुन नदिन जुम्लाको तिला गाउँपालिकाले विवाहको लागि अनिवार्य रुपमा वडाको सिफारिस लिनुपर्ने नियम बनाएको छ।

गाउँपालिका कार्यालयले विवाहको लागि वडाको सिफारिस अनिवार्य गरेको हो।वडाध्यक्ष जङ्गबहादुर रोकायाका अनुसार उमेर नपुग्दै विवाह गर्नेको सङ्ख्या बढेपछि गाउँपालिकाले पालिकाभित्रका नौवटै वडामा विवाहका लागि सिफारिस अनिवार्य गर्नुपर्ने परिपत्र गरेको हो।

गाउँपालिकाको परिपत्रपछि वडा नम्बर ६ ले विवाह गर्दा वडाको सिफारिस अनिवार्य गर्ने नियमलाई कडाइका साथ लागू गरेको रोकायाले बताउनुभयो ।

कम उमेरमा विवाह हुँदा प्रजनन स्वास्थ्यमा समस्या देखिने र आमा तथा बच्चाकै ज्यान जोखिममा पर्न थालेपछि वडाले विवाह गर्न सिफारिस अनिवार्य गरेको हो।

विवाह गर्दा वडाको सिफारिस अनिवार्य लागू गरिएको छ, वैशाखदेखि विवाह गर्दा नागरिकले अनिवार्य रुपमा वडाबाट सिफारिस लिनुपर्ने नियम बनाएका छौँ वडाध्यक्ष रोकायाले भन्नुभयो ।